2020 йилги пандемия бизнесга салбий таъсир кўрсатганига қарамай, компаниялар раҳбарларини олдин ҳатто хаёлга келмаган ноанъанавий ғояларни амалга оширишга ундади. Одамлар уйдан чиқмасдан, турли онлайн сервислар орқали остонасига қадар етказиб берадиган хизматлардан фойдаланишга ўтди. Бу нафақат озиқ-овқат ёки кундалик эҳтиёж маҳсулотларига, балки автомобиллар савдосига ҳам тааллуқли, деб ёзади CARakoom.
Апрель ойида бошланган пандемиядан буён интернет орқали 26 миллион долларга 460 дан ортиқ автомобилни интернет орқали сотган Volkswagen’нинг Австралиядаги дилери ҳам машиналар савдосига ижодий ёндашди.
Австралияликлар дунёдаги энг кичкина автосалонни яратди. Унинг кўплаб виртуал автосалонлардан фарқи, у ростан ҳам мавжуд. Кичкина автосалон баландлиги 28 сантиметрга тенг Volkswagen дилерлик марказининг оддий макети кўринишида. Унинг ичидан Volkswagen’нинг турли моделлари макети ўрин олган. Ҳатто уларнинг интерьери ҳам майда деталларига қадар ишланган.
Унга жойлаштирилган QR-код орқали мижоз қўшимча реаллик имкониятларига эга онлайн кўргазма залига йўл олади. Ушбу функциялардан фойдаланган ҳолда мижоз автомобилни «синаб кўриши», шундан сўнг тўлиқ созлаши ва харид қилиши мумкин. Қўшимча реаллик технологияси фойдаланувчиларга автомобилларнинг ёруғлиги, эшикларини очиш ва ёпиш, интерьерини тўлиқ ўрганиш имконини беради.
«Кўплаб одамлар австралияликлар ҳеч қачон интернет орқали автомобиль харид қилишга тайёр бўлишини ўйламаган. Бироқ интернет-дўконимизнинг муваффақияти буни исботлаб турибди. Дунёдаги энг митти дилерлик салони ва қўшимча реалликнинг ишга туширилиши интернет орқали автомобиллар харидини осонлаштириш ва қулайлаштиришга йўналтирилган», — дейди Volkswagen Australia маркетинг ва мижозлар билан ишлаш бўйича директори Жейсон Бредшоу.
Мавзуга доир:Хитой компанияси коронавирус сабаб машина калитларини харидорларга дронлар ёрдамида етказиб бермоқда
Изоҳ (0)