Klein Vision компанияси томонидан яратилган модель бирданига минг километрга яқин йўл босиши ва самолётга айланиши мумкин. Учиш воситасини синовдан ўтказиш доирасида у 450 метрдан ортиқ баландликка кўтарилган, деб хабар беради Daily Mail.
Бу каби парвозни у икки марта муваффақиятли бажарган. Парвозни амалга ошириш учун камида 30 метрли учиш-қўниш йўлаги керак. Автомобиль соатига 200 километр тезликка қадар чиқа олади.
Klein Vision компаниясининг маълум қилишича, автомобиль бирданига минг километр йўл босиши мумкин. Унинг оғирлиги минг килограммдан ортиқ бўлиб, 200 килограммгача юк кўтара олади. Автомобилнинг ихчам ўлчами сабаб уни исталган жойга қўндириш мумкин.
Машина икки ўринли модель сифатида тақдим этилган бўлиб, унга 140 от кучига эга 1,6 литрли BMW двигатели ўрнатилган.
AirCar’нинг ёйиладиган қанотлари ва орқа қисмида битта пропеллер бор. Автомобиль оддий йўлда ҳаракатланаётганида қанотлар йиғилади.
Таъкидланишича, 2020 йилдан бошлаб бу каби автомобилларни йўллар ва ҳавода учратиш мумкин бўлади. Ихтирочиларнинг сўзларига кўра, у саёҳат ва такси хизматларида қўл келади. Шунингдек, лойиҳа ҳайдовчи уни қўшимча тайёргарликсиз бошқариш имконини беради. Автомобиль яна синовлардан ўтиши ва савдоларга тайёр бўлиши керак.
Аввалроқ Япониядаги SkyDrive стартапига тегишли учар автомобиль муваффақиятли синовдан ўтказилгани тўғрисида хабар берилганди.
Мавзуга доир: Исроилда учар автомобиль прототипи яратилди
Изоҳ (0)