Наманган вилоятининг Норин туманини вилоят маркази билан боғловчи «Нориндарё» кўприги фойдаланишга топширилди. Бу ҳақда «Дарё» мухбири Азизбек Абдувалиев хабар бермоқда.
Фарғона ҳалқа йўлининг 98-километрида жойлашган Норин дарёси устидан ўтган автомобиль кўприги орқали ҳаракатланиш 2020 йил 24 апрель куни тўхтатилганди. Бунга 1962 йилда барпо этилган кўприкда кузатилган дарз ва ёриқлар сабаб бўлганди.
Андижон ва Наманган вилоятларини автомобиль йўли орқали ўзаро боғлайдиган Норин дарёси устидан ўтган мазкур иншоот 6 ой давомида «Ўзбекистон темир йўллари» акциядорлик жамиятига қарашли «Кўприкқурилиш трести» унитар корхонаси мутахассислари томонидан реконструкция қилинди. Бунинг учун 8,3 миллиард сўм маблағ сарфланди.
Кўприк 2 тасмали автомобиль йўлидан иборат бўлиб, ундан 1 соатда 834 та, суткасига эса 20 мингдан ортиқ автомобиль ўтказиш имконияти мавжуд.
Реконструкциядан сўнг мазкур кўприкнинг эни қарийб 1,5 метрга кенгайтирилиб, икки четида пиёдалар учун йўлаклар ҳам қурилди. Йўлакларнинг ён қисмига баландлиги 1 метр 15 сантиметрлик темир панжаралар ўрнатилди. Ҳозирда кўприкнинг узунлиги 275, эни 10, баландлиги эса 7 метрни ташкил этмоқда.
Норин ҳамда Уйчи туманларига ўтиб қайтадиган пиёдаларнинг кечки пайтда ҳам кўприкда бемалол ҳаракатланишларини таъминлаш учун 13 та электродиодли ёритгичлар ўрнатилди.
Маълумот учун, 160 мингдан ортиқ аҳолига эга Норин тумани фуқаролари 6 ой давомида вилоят марказига қатнаш учун Учқўрғон ва Балиқчи туманлари орқали айланиб боришига тўғри келганди.
Аввалроқ ижтимоий тармоқларда одамлар дарёнинг нариги қирғоғига қайиқларда ўтишга мажбур бўлаётгани акс этган видеолар тарқалганди. Шундан сўнг Мудофаа ва Фавқулодда вазиятлар вазирлиги ҳарбий хизматчилари дарё ўзани узра вақтинчалик кўприк кўтарганди.
Изоҳ (0)