Янги Зеландия референдумда эвтаназияни маъқуллади ва марихуана қонунийлаштирилишига қарши чиқди

Янги Зеландия бедаво касалликларга чалинган одамлар учун эвтаназияни қонунийлаштиришни ёқлаб овоз берди, деб ёзади TJournal референдумнинг дастлабки натижаларига таяниб. Бунга фуқароларнинг 65 фоиздан ортиғи овоз берган. Якуний натижалар 6 ноябрь куни эълон қилинади.

Қонун кўпи билан олти ой умри қолган, вояга етган янги зеландияликларга эвтаназияни ўтказиш имконини беради. Уни даволовчи шифокор ва мустақил тиббий мутахассис беморга босим ўтказилмаётгани ва у ўзи англаган ҳолда буни танлаётганига ишонч ҳосил қилиб, маъқуллаши керак.

Агар аҳолининг кўпчилиги эвтаназия учун овоз берса, қонун якуний натижалар эълон қилинганидан кейин 12 ой ўтиб — 2021 йил ноябрида кучга киради.

Референдумда, шунингдек, марихуанани қонунийлаштириш масаласи ҳам кўтарилди, кўпчилик — 53 фоиздан зиёд одам унга қарши овоз берди, 46 фоиз аҳоли уни маъқуллади.

Аммо кўпчилик маъқуллаган тақдирда ҳам, қонун автоматик тарзда кучга кирмайди. Ҳукумат тегишли қонун лойиҳасини киритиши, шундан сўнг у жамоатчилик муҳокамасига қўйилиши керак бўлади.

Бунда 20 ёшга тўлган янги зеландияликлар лицензияланган нуқталарда 14 граммгача каннабис сотиб олиши, уни махсус жойларда ёки уйда қабул қилиши, шунингдек, кўпи билан иккита ёки битта оилага тўрттагача ўсимлик ўстириши кўзда тутилган. Қайт этилишича, бунда гап тиббий марихуана ҳақида бормаяпти — у мамлакатда 2018 йилдаёқ қонунийлаштирилган.

Аввалроқ Украинадаги ялпи ижтимоий сўровда тиббий марихуананинг қонунийлаштирилишини 70 фоиз иштирокчи қўллаб-қувватлаган эди.

Маълумот учун, эвтаназия — ҳар хил ҳаракатлар ёки қуроллар билан, ҳаётини сунъий йўл билан ушлаб турган асбобларнинг ишини тўхтатиш йўли билан беморнинг ўз ўлимини тезлатиш ҳақидаги илтимосини қаноатлантиришдир. Одатда бедаво касалликка чалинган ва бунинг натижасида чидаб бўлмас азоб чекаётган инсонларнинг илтимосига биноан амалга оширилади. Унинг икки тури бор — фаол ва пассив, айни вақтда пассивини яна икки турга — ихтиёрий ва мажбурийга ажратиш мумкин. Жаҳоннинг бир қатор давлатларида эвтаназияга расман рухсат берилган; Ўзбекистонда ҳуқуқий мақоми номаълум.