Франция пойтахти Париж шаҳрида қуролланган эркак полициячиларга ҳужум қилишга уринди. Бу ҳақда Meduza хабар берди.
Хабар берилишича, Парижнинг 15-мавзесида яшайдиган аёл 30 октябрь куни кундузи полицияга ҳовлида икки нафар шубҳали эркакни кўргани ҳақида хабар берган.
Полициячилар кўрсатилган манзилга етиб келганида иккита ошхона пичоғи билан қуролланган эркак «Аллоҳу акбар» деб бақириб, уларга ҳужум қилишга уринган. Полициячилар электрошокер, тўппонча ва таёқ қўллашга мажбур бўлган.
Ҳужум қилган эркак, тахминан, 40 ёшда бўлиб, у қўлга олинган. Эркак билан бирга унинг 60 ёшли отаси ҳам қўлга олинган.
Маълум бўлишича, ҳужум қилган эркак аллақачон полиция кузатувида бўлган. Баъзи маълумотларга кўра, унда шизофрения касаллиги мавжуд.
Эслатиб ўтамиз, 29 октябрь куни Франциянинг Ницца шаҳридаги Нотр-Дам ибодатхонасида қуролланган эркак одамларга ҳужум қилиб, уч кишини ўлдирди. Жиноятчи 21 ёшли тунислик бўлиб чиқди. Франция ҳукумати Ниццадаги ҳужумни теракт деб баҳолади, мамлакатда террористик хавфнинг энг юқори даражаси эълон қилинди.
29 октябрнинг ўзида Франциянинг Авиньон шаҳрида пичоқ билан қуролланган эркак «Аллоҳу акбар» деб қичқириб, полициячиларга ҳужум қилишга уринган. Полициячилар ўт очган ва ҳужум қилган эркакни ўлдирган. Деярли бир вақтда Саудия Арабистонининг Жидда шаҳрида Франция консуллигига ҳужум уюштирилган, консуллик қўриқчиси жароҳат олган. Ҳужум қилган эркак қўлга олинган. Бундан ташқари, Францияда Лион шаҳрида ҳам содир бўлиши мумкин бўлган яна бир тажовузкор ҳаракатнинг олди олинган.
Изоҳ (0)