Туркияда содир бўлган зилзила оқибатида ҳалок бўлганлар сони 17 нафарга, жароҳат олганлар — 709 кишига етди. Бу ҳақда мамлакат Фавқулодда ҳолатлар ва табиий офатлар бўйича агентлигига таяниб, «РИА Новости» хабар берди.
«Ҳалок бўлганлар сони 17 нафарга, жароҳат олганлар эса 709 кишига етди», — дейилади хабарда.
Эслатиб ўтамиз, 30 октябрь куни Туркия ғарбида 6,6 магнитудали зилзила юз берди, эпимарказ Измир вилоятининг Сеферлихисар шаҳри атрофида жойлашган. Ерости силкинишлари Греция ороллари яқинида ҳам қайд этилган бўлиб, сейсмологлар унинг магнитудасини 6,9 га баҳолаган. Измир вилоятидаги камида 20 та бино вайрон бўлган. Зилзила у қадар катта бўлмаган сунамини юзага келтирган. Сеферлихисарнинг айрим кўчаларини сув босган.
Шунингдек, Грециянинг Самос оролида зилзила оқибатида 2 киши ҳалок бўлган ва 20 киши жароҳат олган.
Ўзбекистон Ташқи ишлар вазирлиги Туркияда юз берган зилзилада ҳалок бўлган ва жароҳат олганлар орасида ўзбекистонликлар қайд этилмаганини маълум қилди.
Изоҳ (0)