Коронавирус пандемияси даврида Японияда ҳомиладорлик ва никоҳ кўрсаткичларининг пасайиши тез қариётган мамлакатдаги демографик инқирозни янада кучайтириши мумкин, деб хабар беради Cursorinfo.cо.il.
Япония жамияти дунёдаги кекса жамият ҳисобланади. Бу мамлакатда 2050 йилга келиб аҳолининг 35 фоизи 65 ёшдан ошиши кутилмоқда. Бу эса иқтисодий ўсиш учун хавфлар яратади ва мамлакат молиясини қийин аҳволга солиб қўйиши мумкин.
«Коронавирус тарқалиши одамларнинг ҳомиладорлик, фарзанд кўриш ва болаларни тарбиялаш борасида хавотирга тушишига сабаб бўлмоқда», — деди Японияда туғилиш кўрсаткичининг камайиши масалалари бўйича вазир Тецуши Сакамото.
Яқинда эълон қилинган расмий маълумотларга кўра, Японияда уч ой ичида қайд этилган ҳомиладорлар сони ўтган йилнинг шу даврига қараганда 11,4 фоизга, никоҳлар сони эса 36,9 фоизга пасайган.
«Бу жуда жиддий масала, чунки салбий оқибатлар сақланиб қолиши мумкин, иқтисодий пасайиш эса кам никоҳга ва кам туғилишга олиб келади», — деди Dai-ichi Life Research Instuite бош иқтисодчиси Хидео Кумано.
Пандемия мамлакатда мавжуд бўлиб келган туғилиш кўрсаткичининг пасайиши тенденциясини кучайтирди, буни собиқ бош вазир «миллий инқироз» деб атаган эди. 2019 йил Японияда туғилиш даражаси 5,8 фоизга камайиб, 865 минг бола туғилган, бу тарихдаги энг паст кўрсаткичдир.
Япония Педиатрия ассоциациясининг огоҳлантиришича, пандемия туфайли туғилиш кўрсаткичининг пасайиши ўн йилга тезлашиши мумкин, бу тенденция педиатрия тиббиётини йўқ қилиши, шунингдек, бошқа узоқ давом этувчи оқибатларга олиб келиши мумкин.
Халқаро валюта жамғармаси 2021 йилда дунё иқтисодиёти 5,2 фоизга ўсишини тахмин қилмоқда, Японияда эса бу кўрсаткич 2,3 фоиз бўлиши кутилмоқда.
Япониянинг Nikkei газетаси ўтказган сўровда маълум бўлишича, унда қатнашган 22 нафар иқтисодчининг кўпчилиги Япония иқтисодиёти 2024 йилгача пандемиядан олдинги даражага қайтмайди, деган фикрда.
Изоҳ (0)