Ижтимоий тармоқларда «Шофирконлик шифокорлар йиғ-йиғлардан чарчади» сарлавҳали хабар тарқалгач «Дарё» мухбири «Юксалиш» умуммиллий ҳаракатининг Бухоро вилояти бўлими билан ҳамкорликда суриштирув ўтказди.
Маълум бўлишича, Бухоро вилоятининг Шофиркон туман тиббиёт бирлашмасига қарашли кўп тармоқли поликлиниканинг 47 нафар шифокори поликлиниканинг эскирган ва кўримсиз аҳволга келган ўриндиқларига оқ чойшаб ўраш мақсадида 10 минг сўмдан пул йиғган. Пул рўйхат шаклида, имзо орқали, устига-устак, на буйруқ, на касаба уюшмаси қарорисиз ноқонуний йиғилган.
Шундан сўнг ижтимоий тармоқларда «Бухоро вилоятининг Шофиркон тумани тиббиёт бирлашмасига қарашли кўп тармоқли шифохона ходимлари бор-йўғи 1,2 миллион сўмгача маош олишади. Ҳозирги шароитда бу маблағнинг кулгили эканини тушуниш учун катта ақл керакмас. Харажатлардан ташқари, рўзғорга ана шу пулнинг тенг ярми киради. ‘Ўлганнинг устига тепган’ деганларидек, поликлиникамиз мудири Азиз Носировнинг қабулхонасидаги ‘стул’лар қопламаси учун шифокорлардан 10 мингдан пул йиғиляпти. Бунақа ‘йиғ-йиғлар’ тинкамизни қуритди. Шофирконда ҳам прокурор, бошқа идоралар бор. Кимдир эътибор берармикан?!» деган хабар тарқалган.
Шофиркон туман тиббиёт бирлашмасига қарашли кўп тармоқли поликлиника мудири Азиз Носиров «Дарё» мухбири билан суҳбатда ушбу хабарни унга ёмонлик истаганлар тарқатганини айтди. Поликлиника мудирига кўра, ижтимоий тармоқларга хабар тарқалмасдан уч-тўрт кун илгари бир нечта бўлим шифокорлари унинг қабулига ҳар бир бўлим шифокоридан ўн минг сўмдан пул йиғиш орқали эскирган ва ачинарли аҳволга келган ўриндиқларга оқ чойшаб ўраш таклифи билан кирган. Бироқ у масалани қонуний йўл билан ҳал этиш кераклигини айтиб, таклифни ҳам рад этмаган.
«Бор-йўғи 470 минг сўм пул ортидан ҳеч ким манфаатдор бўлишни истамаган. Аммо ишхонани иккинчи уй сифатида кўрган ходимларимнинг хайрли ташаббуси, дея изн бергандим. Аммо ўшандаям, ‘Ўзи арзимаган пул, бу ташаббусингиз нотўғри тарқалиб кетмайдими?’, дея хавотир ҳам олгандим. Мана, ўйлаганим содир бўлди», — дейди поликлиника мудири.
Мазкур ҳолат юзасидан ўтказилган йиғинда «Юксалиш» умуммиллий ҳаракати Бухоро вилояти бўлими раҳбари Ҳамза Рўзиев ноқонуний хатти-ҳаракат эътиборсизлик туфайли, етмагандек, поликлиника мудирининг ўзида ҳуқуқий саводхонлик етишмагани оқибатида юзага келганини билдирди.
«Раҳбар бўла туриб, жиҳозлар эскирганини янгилаш учун йиғилаётган пулга қаршилик қилмай, жим тургансиз. Гап пулнинг миқдорида ҳам эмас, гап шу ҳолатнинг юзага келганида. Бу ташаббус — ноқонуний хатти-ҳаракат, ўз хоҳиши биланми, келишибми, ихтиёрийми, мумкин эмас!», — деди Ҳамза Рўзиев.
Азиз Носиров эса бунга жавобан шифокорларнинг ўзаро келишганини, розилик билан пул йиғилганини, тазйиқ ёки босим, талаб ё мажбурлаш бўлмаганини билдирди.
«Тўғри, хабарим бор эди. Қабулимга кириб, ушбу масалани муҳокама қилишди. Ўзаро кўнгилли бўлиб, пул йиғишди. Ободлик кўнгилдан бошланади, дейишади-ку! Чунки бундан олдин ҳам ўз ҳисобимиздан ободонлаштириш ва кўчат олиш масаласида шундай фаоллик кўрсатганмиз»,— деди поликлиника мудири.
Шунингдек, поликлиника мудири ноқонуний хатти-ҳаракат орқали йиғилган пулга имзо олинган ҳолатни «Ташаббусга шифокорлар иштирокини билиш мақсадида ҳамда ‘ким берди ёки ким бермади’ нуқтаи назаридан рўйхат қилинган» — дея изоҳлади.
Суриштирувга кўра, бундан илгари ҳам поликлиниканинг ёш мудири устидан «ёзишган», кўп тортишув ва келишмовчиликлар юзага келган.
Жараённи биргаликда ўрганган вилоят молия бошқармаси вакили Фазлиддин Зойировнинг билдиришича, поликлиника томонидан йил бошида бошқа харажатлар ҳам режалаштириб берилганда талабнома ўрганилиб, пул ажратилган бўларди. Зойировнинг қўшимча қилишича, жорий йилнинг ўзида Шофиркон туман тиббиёт бирлашмасига қарашли кўп тармоқли поликлиникага биргина мебель жиҳозлари учун 20 миллион сўм маблағ ажратилган.
«Ушбу ташаббус бўйича касаба уюшмасига мурожаат бўлмаган. Пул жамоавий йиғилган. Ҳар бир масала касаба уюшмаси билан келишилган ҳолда, унинг розилиги асосида бўлиши керак. Лекин бу жараёнда касаба уюшмасининг ўрни бўлмаган, муносабат ҳам билдирмаган», — деди йиғинда иштирок этган вилоят касаба уюшмаси вакили.
«Дарё» мухбири поликлиника мудирининг пул йиғиш билан боғлиқ масалада «ўзаро келишгани, розилик билан йиғилгани, тазйиқ, босим, талаб ёки мажбурлаш бўлмагани» ҳақидаги гапи «топшириқ» бўйича амалга оширилган хат билан тўғри келмаётганини айтиб, бунинг сабаби билан қизиқди.
Хатда таъкидланишича, мазкур поликлиникага туман ҳокими Шукрулла Ҳакимов келган ва эскирган ўриндиқларни оқ чойшаб билан қоплаш лозимлигини билдирган. Ушбу топшириқни амалга ошириш эса ноқонуний хатти-ҳаракат орқали амалга оширилган.Поликлиника мудири Азиз Носиров хатдаги «топшириқ» сўзини «грамматик хато бўлиши мумкин» дея талқин этди.
Мулоқотда сўз олган шифокорлар йиғилган пулни ҳеч қандай хусуматсиз, хайрли ташаббус учун йиғишганини, унинг ортида манфаат ётмаганлигини билдирди. Шу ўринда, поликлиника жамоаси ижтимоий тармоқларда «имзоли рўйхат»ни тарқатган шахсни ҳуқуқ-тартибот идоралари томонидан аниқлаб, унинг хатти-ҳаракатига нисбатан баҳо бериш таклифини ўртага ташлади.
«Ижтимоий тармоқда келтирилган маълумотлар мантиққа тўғри келмайди. Имкон бўлса, ҳолатга ҳуқуқ-тартибот идоралари томонидан аниқлик киритилса», — деди Азиз Носиров.
Изоҳ (0)