Ўзбекистоннинг ташқи савдодаги энг йирик ҳамкорлари маълум қилинди

Ўзбекистон билан ташқи савдо айланмаси ҳажми йирик бўлган давлатлар рўйхати Давлат статистика қўмитаси томонидан эълон қилинди.

Унга кўра, Ўзбекистоннинг энг йирик савдо ҳамкорлари рўйхатининг биринчи ўринида 4,6 миллиард (экспорт – 1,4 миллиард, импорт – 3,2 миллиард) АҚШ доллари ҳажмидаги савдо айланмаси билан Хитой турибди. Шунингдек, кучли учликдан Россия (савдо айланмаси – 4,1 миллиард, экспорт – 1,1 миллиард, импорт – 3,0 миллиард АҚШ доллари) ва Қозоғистон (савдо айланмаси – 2,0 миллиард, экспорт – 646,2 миллион, импорт – 1,3 миллиард АҚШ доллари) жой олган.

Кейинги ўринларни қуйидаги давлатлар эгаллаган:

• Жанубий Корея (савдо айланмаси – 1,59 миллиард, экспорт – 34,1 миллион, импорт – 1,56 миллиард АҚШ доллари);
• Туркия (савдо айланмаси – 1,4 миллиард, экспорт – 650,9 миллион, импорт 783,2 миллион АҚШ доллари);
• Қирғизистон (савдо айланмаси – 660,7 миллион, экспорт – 561,1 миллион, импорт 99,6 миллион АҚШ доллари);
• Германия (савдо айланмаси – 574,0 миллион, экспорт – 51,3 миллион, импорт 522,8 миллион АҚШ доллари);
• Афғонистон (савдо айланмаси – 542,9 миллион, экспорт – 541,3 миллион, импорт 1,7 миллион АҚШ доллар);
• Тожикистон (савдо айланмаси – 358,8 миллион, экспорт – 289,1 миллион, импорт 69,7 миллион АҚШ доллари);
• Туркманистон (савдо айланмаси – 323,6 миллион, экспорт – 97,8 миллион, импорт 225,9 миллион АҚШ доллари).

Аввалроқ Ўзбекистон ташқи савдо айланмаси 3,7 млрд долларга камайгани хабар қилинганди.