Ўзбекистон фуқаролари 50 млн долларлик Apple техникаси контрабандасида айбланмоқда

АҚШ Федерал қидирув бюроси, Божхона ва чегара хизматлари, Нью-Йорк полиция департаменти ва бошқа давлат идоралари томонидан ўтказилган текширув ишлари якунига кўра, 10 киши 50 миллион долларлик электрон қурилмалар контрабандаси иши бўйича айбланди, деб хабар беради Spot.

Интерпол миллий марказий бюросининг маълум қилишича, айбланувчилар орасида Ўзбекистон фуқаролари ҳам бор — Акмал Асадов (38 ёш), Шохруҳ Саидов (31), Азамат Бобомуродов (31), Зокир Искандаров (30 ёш).

Нью-Йорк штати шарқий округи полициясининг сайтида ёзилишича, айбланувчиларга Россиянинг «Аэрофлот» авиакомпаниясининг амалдаги ва собиқ ходимлари ёрдам кўрсатган, бироқ компаниянинг ўзи буни рад этмоқди.

Ҳуқуқ-тартибот органлари ходимлари экипаж аъзоларининг юкларини текшириш вақтида «миллионлаб долларлик» қурилмаларни топган. Улар орасида ноқонуний равишда ташилган техникалар — iPhone, iPad ва Apple Watch қурилмалари бор. Қайд этилишича, ушбу қурилмаларнинг аксарияти ўғирланган. АҚШ Давлат департаменти ҳозирда «Аэрофлот» ходимларининг 113 та визасини бекор қилган.