Ўзбекистон халқ шоири, Ўзбекистон Ёзувчилар уюшмаси аъзоси Омон Матжон 29 октябрга ўтар кечаси 77 ёшида Тошкент шаҳрида вафот этди. Бу ҳақда уюшма ахборот хизмати хабар берди.
Омон Матжон 1943 йили Хоразм вилоятининг Гурлан туманида таваллуд топган. Ўрта мактабни тугатгач, Самарқанд давлат университетида таҳсил олган. 1969—2002 йиллар мобайнида Ғафур Ғулом номидаги Адабиёт ва санъат нашриётида муҳаррир, бўлим бошлиғи, «Ёшлик» журналида бош муҳаррир, «Чўлпон» нашриётида директор бўлиб ишлаган.
Шоирнинг энг яхши шеърлари 20 га яқин шеърий тўпламга жамланган, шунингдек, «Тўрабекахоним» насрий қиссаси ва «Нажмиддин Кубро», «Ардахива» бадиалари чоп этилган. Омон Матжон ижодида «Чўлдагилар» достон хроникаси, «Гаплашадиган вақтлар» шеърий қиссаси алоҳида ўрин эгаллайди. Шоирнинг 2000 йили «Авесто»нинг 2700 йиллигига бағишланган «Ардахива» асари чоп этилган.
Омон Матжон қардош ва чет эл адабиётидан кўплаб намуналарни ўзбек тилигага маҳорат билан ўгирган. Хусусан, Фридрих Шиллер, Шарль Бодлер каби жаҳон классиклари, Евгений Евтушенко, Расул Ҳамзатов, Шандор Петефи, Юстинас Марцинкявичюс, Берди Кербобоев, Сухроб Тоҳир, Ибройим Юсупов сингари шоир ва адиблар ижодидан қилган таржималари эътиборга лойиқ.
Ўзбекистон халқ шоири Омон Матжон ўзбек адабиётнинг ривожи йўлидаги хизматлари учун Давлат мукофотига сазовор бўлган.
Омон Матжон қаламига мансуб «Умр ўтар, вақт ўтар» шеъри кўплаб хонандалар томонидан қўшиқ қилиб куйланган ва халқ орасида машҳурликка эришган.
Аввалроқ таниқли ёзувчи Мамадали Маҳмудов 79 ёшида, Шароф Рашидовнинг укаси, Ўзбекистон санъат арбоби, таниқли педагог олим, адабиёцҳунос ва таржимон Асил Рашидов 90 ёшида, адабиёцҳунос олим, филология фанлари доктори, профессор Санжар Содиқов 80 ёшида, ёзувчи, драматург, публицист, Ўзбекистон санъат арбоби Абдуқаҳҳор Иброҳимов 79 ёшида оламдан ўтгани тўғрисида хабар берилганди.
Изоҳ (0)