Чехия соғлиқни сақлаш вазири Роман Примула ўзи жорий қилган коронавирусга қарши кураш чораларини бузгани учун истеъфога чиқмоқда, деб хабар беради Asia Plus.
Чехия президенти Милош Земан 29 октябрь куни соғлиқни сақлаш вазирлигига янги раҳбар тайинлайди. Бу ҳақда давлат раҳбарининг матбуот котиби маълум қилган.
Ишдан кетаётган вазир атрофидаги шов-шув ўтган ҳафта кўтарилди. 22 октябрь куни журналистлар сиёсатчини ресторандан ниқобсиз ҳолда чиқаётганини суратга олган. 14 октябрь куни мамлакатда коронавирус эпидемиясига қарши кураш доирасида умумий овқатланиш муассасаларининг фаолияти ҳукумат қарори билан тўхтатилган эди. Таомларни ойна орқали ўзи билан олиб кетиш ҳамда фақат кечки 8 гача сотиш мумкин.
Мутахассислиги бўйича эпидемиолог бўлган Примула қатъий карантин чоралари тарафдори сифатида маълум. Локдаун киритилиши арафасида у мамлакат аҳолиси контактлари чекламаганлигидан нолиган эди. Ўз телемурожаатида эса фуқароларни коронавирус чекловларига қатъий риоя қилишга чақирган эди.
Blest нашри маълумотларига кўра, Роман Примула серҳашам ресторанлардан бирига 22:00 да кириб кетиб, деярли ярим кечаси у ердан чиққан. Унда тиббий ниқоб ҳам бўлмаган. Унга эшикни очган ҳайдовчига яқинлашганда ҳам, автомобиль салонида ҳам ниқобни тақмаган.
Чехия соғлиқни сақлаш вазирлиги жорий қилган қоидаларга кўра, мамлакат аҳолиси нафақат бино ичида, балки кўчада ҳам, агар бошқа пиёдаларга икки метрдан яқинроқ келса, ва автомобиль ичида ҳам, агар ҳайдовчи ва йўловчи битта оила аъзолари бўлмаса, ниқоб тақиши керак.
Ресторанда вазир билан бирга бошқа одамлар ҳам бўлган, шу жумладан, АНО фракцияси раиси Ярослав Фалтинек ва ўша ресторан эгаси Раймон Шпунда. Улар бинодан биргаликда чиққан, уларда ҳам ниқоб бўлмаган.
28 октябрдан мамлакатда ССВ қарори билан кечаси комендантлик соати жорий қилинган.
Чехияда 5 октябрдан COVID-19 билан боғлиқ вазиятнинг ёмонлашуви сабабли 30 кунга фавқулодда ҳолат режими жорий қилинганди.
Мамлакат Соғлиқни сақлаш вазирлиги инфекциянинг юқори даражаси бир-икки ҳафта давомида сақланиб қолади ва кейинчалик қатъий чеклов чоралари туфайли камаяди, деб ҳисоблайди. Мутахассисларнинг фикрича, агар чора-тадбирлар натижа бермаса, ой охирига бориб касалланганлар сони чорак миллионга етиши мумкин.
Изоҳ (0)