29 октябрдан Францияда умумий яккаланиш режими жорий этилди, у камида 1 декабрга қадар давом этади. Бу ҳақда мамлакат президенти Эмманюэль Макрон эълон қилди, деб ёзади Meduza.
Франция аҳолиси уйдан ишга, дўконга, сайрга ҳамда тиббий ёрдам олишга чиқиши мумкин. Оммавий тадбирлар бекор қилинади. Кўп сонли одамлар тўпланадиган жойлар, хусусан, бар ва ресторанлар ёпилади. Бунинг имконияти бўлган барча корхоналарда масофадан ишлаш формати жорий этилади. Университетлар ҳам масофадан ўқишга ўтади. Аммо болалар боғчалари ва мактаблар ишлашда давом этади.
«Мақсадимиз — касалланиш ҳолатларини кунига 40 мингтадан 5 мингтагача камайтириш», — деди Макрон.
Сўнгги бир кеча-кундузда Францияда 36 437 та COVID-19’га чалиниш ҳолатлари қайд этилган, 244 киши вафот этган. Пандемия бошидан буён мамлакатда 1 235 132 киши касалликни юқтирган, шулардан 35785 нафари вафот этган.
Умумий карантин Францияда баҳорда ҳам жорий қилинган эди. Ўшанда чекловлар қатъийроқ бўлган, масалан, барча таълим муассасалари ишламаганди.
28 октябрь куни шунга ўхшаш чеклов чоралари ҳақида Германия ҳам маълум қилди. Улар 2 ноябрдан амал қилишни бошлайди.
22 октябрь куни Францияда COVID-19 коронавирус инфекциясига чалинган аҳолининг сони миллиондан ошган ва мамлакат бу борада Европанинг иккинчи давлатига айланган эди.
ЖССТ аввалроқ ўтган бир ҳафта ичида дунёда коронавирусга чалиниш ҳолатлари сони бўйича рекорд даража қайд этилганини маълум қилганди.
Изоҳ (0)