Chexiya sog‘liqni saqlash vaziri Roman Primula o‘zi joriy qilgan koronavirusga qarshi kurash choralarini buzgani uchun iste’foga chiqmoqda, deb xabar beradi Asia Plus.
Chexiya prezidenti Milosh Zeman 29-oktabr kuni sog‘liqni saqlash vazirligiga yangi rahbar tayinlaydi. Bu haqda davlat rahbarining matbuot kotibi ma’lum qilgan.
Ishdan ketayotgan vazir atrofidagi shov-shuv o‘tgan hafta ko‘tarildi. 22-oktabr kuni jurnalistlar siyosatchini restorandan niqobsiz holda chiqayotganini suratga olgan. 14-oktabr kuni mamlakatda koronavirus epidemiyasiga qarshi kurash doirasida umumiy ovqatlanish muassasalarining faoliyati hukumat qarori bilan to‘xtatilgan edi. Taomlarni oyna orqali o‘zi bilan olib ketish hamda faqat kechki 8 gacha sotish mumkin.
Mutaxassisligi bo‘yicha epidemiolog bo‘lgan Primula qat’iy karantin choralari tarafdori sifatida ma’lum. Lokdaun kiritilishi arafasida u mamlakat aholisi kontaktlari cheklamaganligidan noligan edi. O‘z telemurojaatida esa fuqarolarni koronavirus cheklovlariga qat’iy rioya qilishga chaqirgan edi.
Blest nashri ma’lumotlariga ko‘ra, Roman Primula serhasham restoranlardan biriga 22:00 da kirib ketib, deyarli yarim kechasi u yerdan chiqqan. Unda tibbiy niqob ham bo‘lmagan. Unga eshikni ochgan haydovchiga yaqinlashganda ham, avtomobil salonida ham niqobni taqmagan.
Chexiya sog‘liqni saqlash vazirligi joriy qilgan qoidalarga ko‘ra, mamlakat aholisi nafaqat bino ichida, balki ko‘chada ham, agar boshqa piyodalarga ikki metrdan yaqinroq kelsa, va avtomobil ichida ham, agar haydovchi va yo‘lovchi bitta oila a’zolari bo‘lmasa, niqob taqishi kerak.
Restoranda vazir bilan birga boshqa odamlar ham bo‘lgan, shu jumladan, ANO fraksiyasi raisi Yaroslav Faltinek va o‘sha restoran egasi Raymon Shpunda. Ular binodan birgalikda chiqqan, ularda ham niqob bo‘lmagan.
28-oktabrdan mamlakatda SSV qarori bilan kechasi komendantlik soati joriy qilingan.
Chexiyada 5-oktabrdan COVID-19 bilan bog‘liq vaziyatning yomonlashuvi sababli 30 kunga favqulodda holat rejimi joriy qilingandi.
Mamlakat Sog‘liqni saqlash vazirligi infeksiyaning yuqori darajasi bir-ikki hafta davomida saqlanib qoladi va keyinchalik qat’iy cheklov choralari tufayli kamayadi, deb hisoblaydi. Mutaxassislarning fikricha, agar chora-tadbirlar natija bermasa, oy oxiriga borib kasallanganlar soni chorak millionga yetishi mumkin.
Izoh (0)