Жанубий Корея ОАВлари КХДР етакчиси Ким Чен Иннинг рафиқаси Ри Соль Чжу ҳақида ҳеч қандай янгилик йўқлигига эътибор қаратди. Ри Соль Чжу Шимолий Корея расмий янгиликларида сўнгги марта 2020 йилнинг 25 январида кўринган. Унинг кўринмаётганига турли сабаблар, жумладан, ҳомиладорлик кўрсатилмоқда. Бу ҳақда «РИА Новости» хабар берди.
Ким Чен Ин 2019 йилнинг декабрь ойида оқ отда Шимолий Корея фуқаролари учун муқаддас бўлган Пектусан тоғига ташриф буюрган, КХДР етакчисига унинг яқин маслаҳатчилари ва рафиқаси ҳамроҳлик қилган. 25 январда Ри Соль Чжу Ой тақвими бўйича Янги йил муносабати билан «Самчжиён» мусиқали театри спектаклида эрига ҳамроҳлик қилган.
Шундан буён Шимолий Корея етакчиси бир неча марта йирик тадбирларда қатнашди. 10 октябрда Корея Ишчилар партиясига асос солинганининг 75 йиллиги шарафига ҳарбий парад ташкил қилинди, кейин эса гимнастикачиларнинг кенг қамровли байрамона чиқиши бўлиб ўтди. Бироқ бу тадбирларнинг ҳеч бирида Ри Соль Чжу иштирок этмаган.
Yonhap агентлигининг хабар беришича, Жанубий Кореянинг бирлашиш вазири Ли Ин Ён хулоса қилишга шошилмасликка чақирган ҳамда аввалроқ ОАВлар Ким Чен Иннинг «йўқолиб қолган» синглиси Ким Ё Чжонни излаганини, у эса икки ойдан кейин омма олдида пайдо бўлганини эслатиб ўтган.
«Халқ кучи» партияси депутати Чон Чжин Соннинг қайд этишича, миш-мишларга кўра, Ри Соль Чжу даволанаётган холасига қарамоқда ёки вақтини болаларни ўқитишга қаратмоқда. Ким Чен Иннинг рафиқаси йўқолиб қолишига сабаб сифатида коронавирус тарқалгани сабабли кўрилган эҳтиёткорлик ҳам кўрсатилмоқда.
Ким Чен Иннинг болалари борлиги ва уларнинг нечталиги ҳақида аниқ маълумот йўқ. Турли манбалар КХДР етакчисининг икки, уч ва ҳатто тўрт нафар фарзанди борлиги ҳақида гапиради. Ри Соль Чжунинг ҳомиладорлиги ҳақида сўнгги йилларда бир неча марта миш-мишлар тарқалган, бунга унинг бир муддат телевизор экранлари ва газета саҳифаларидан йўқолиб қолгани сабаб бўлган.
Манбалардан бирига кўра, дастлабки икки фарзанд 2010 ва 2013 йилда туғилган қизлар эканлиги тахмин қилинади. Бошқа манбалар эса Ри Соль Чжунинг биринчи қизи 2012 йилнинг декабрь ойида туғилганини таъкидлайди. КХДР биринчи хонимининг иккинчи марта ҳомиладор бўлганлиги ҳақида 2014 йилда хабарлар тарқалган. 2019 йилда Жанубий Корея ОАВлари разведка манбасига таяниб, Ким Чен Иннинг учинчи фарзанди туғилгани ҳақида хабар берган, бироқ боланинг жинсига аниқлик киритилмаган.
Изоҳ (0)