Ҳоким сифатида иш бошлагач биринчи маошини эҳтиёжмандларга хайрия қилган Қашқадарё вилоятининг Ғузор тумани ҳокими Бекзод Суюнов аҳолига 55 минг сўмдан гўшт етказиб бермоқчи бўлган тадбиркордан нархни янада арзонлаштиришни сўради. Бу ҳақда Халқ депутатлари Ғузор тумани Кенгашининг навбатдаги сессиясида сўз борди, дея хабар берди «Дарё» мухбири.
Маълум бўлишича, 2020 йил 22 октябрь куни Халқ депутатлари Ғузор туман Кенгашининг навбатдаги сессияси бўлиб ўтган. Сессияда сўз олган туман ҳокими Бекзод Суюнов туманда озиқ-овқат нархини барқарорлаштириш учун қилинаётган ишлар ҳақида маълумот берган.
Ҳокимнинг таъкидлашича, туманда 206 мингдан ортиқ аҳоли истиқомат қилади. Жорий йилнинг ўтган тўққиз ойида шунча аҳолига 21,8 минг тонна гўшт, 60 минг тонна сут, 19,4 миллион дона тухум, 1,9 минг тонна картошка, 17,0 минг тонна сабзавот, 7,8 минг тонна полиз маҳсулотлари, 5,2 минг тонна мева етказиб берилган.
Шунингдек, туманда 40 гектар жойда иссиқхоналар ташкил этилган бўлиб, улардан олинаётган маҳсулотларни сифатли сақлаш учун 5200 тонна сиғимга эга 4 та совутгич ҳамда 1325 тонналик 3 та омбор фаолияти йўлга қўйилган.
«Маҳсулотлар савдоси учун тумандаги 2 та бозорда ва 23 та аҳоли гавжум масканларда арзонлаштирилган маҳсулотлар ярмаркалари ташкил қилинмоқда. Шунингдек, туманимизда ҳам муҳтарам Президентимиз ташаббуси билан ташкил этилаётган ‘Озиқ – овқат хавфсизлиги’ жамғармаси ҳисобидан аҳолини озиқ-овқат ва қишлоқ хўжалиги маҳсулотлари билан узлуксиз таъминлаш, бозорларда нарх-навонинг кескин ошишининг олдини олиш мақсадида катта харидларни амалга ошираётган тадбиркорларга фоизсиз кредитлар ажратилмоқда», — деди туман ҳокими Бекзод Суюнов.
Сессия давомида сўз олган тадбиркор Ҳамза Тоштемиров туман аҳолисини арзон гўшт билан таъминлашини айтиб, жамғарма ҳисобидан қўллаб-қувватланса, мол гўштини 55 минг сўмдан етказиб беришни маълум қилган. Тадбиркор ташаббусига жавоб берган ҳоким эса, унга Белоруссияда музлатилган гўшт олиб келишни йўлга қўйса, аҳолига гўштни янаям арзон етказиб бериши мумкинлигини айтган.
«Белоруссиядан музлатилган гўшт олиб келишни йўлга қўйсангиз, ўша музлатилган мол гўштини аҳолига 45 минг сўмдан сотасиз. Шу нарх барча харажатларингизни қоплаб, даромад қилишингизга ҳам етади. Мен барчасини ҳисоб-китоб қилиб кўрдим. Белоруссиядан келтирилган музлатилган гўшт шу нархда сотилса ҳам, қоплайди. Бозорга музлатилган гўштни олиб чиқиб, 45 минг сўмдан соцангиз, сизга рақобатчи бўлаётганлар ҳам гўштини 55-60 минг сўмдан ошириб юбормасликка ҳаракат қилади. Қолаверса, бозорда 45 минг сўмлик гўшт ҳам бўлса, қиммат гўштга қурби етмаган фуқаро 60 минг сўмлик эмас, 45 минг сўмлик гўштдан сотиб олиб, истеъмол қилади», — деган ҳоким.
Ҳокимнинг қўшимча қилишича, тадбиркор Ҳамза Тоштемиров туманга Қозоғистондан мол олиб келиб, аҳолига сифатли гўшт етказиб бериш билан шуғулланади. Ҳоким билан мулоқот қилган тадбиркор Белоруссиядан гўшт олиб келишни йўлга қўйишини маълум қилди.
Эслатиб ўтамиз, аввалроқ деҳқонободлик тадбиркор Қарши аҳолисини арзон гўшт билан таъминлашга ваъда берганди. Тадбиркор ташаббусини қўллаб-қувватлаган вилоят раҳбари Зоир Мирзаев эса тадбиркорга ёрдам бериш учун фоизсиз 1 миллиард сўм кредит бериши мумкинлигини маълум қилганди.
Изоҳ (0)