Ўзбекистон олий таълим муассасаларида 2020/2021-ўқув йилидан бошлаб тўлов-контракт асосида таҳсил олаётган талабалар ўқиш учун тўловларни тенг улушларда тўрт бўлиб тўлаши мумкин. Бу ҳақда Олий ва ўрта махсус таълим вазирлиги ахборот хизматига таяниб, ЎзА хабар берди.
Маълум қилинишича, белгиланган тўлов миқдорининг камида 25 фоизини талабаликка тавсия этилган абитуриентлар 15 сентябргача ёки Ўзбекистон Республикаси таълим муассасаларига ўқишга қабул қилиш бўйича Давлат комиссияси томонидан белгиланган муддатгача тўлаши мумкин. Иккинчи ва ундан кейинги босқич талабалар белгиланган тўлов миқдорининг камида 25 фоизини 1 октябргача ёки олий таълим муассасаси ректори (филиал директори) томонидан узайтирилган муддатгача тўлашига рухсат берилди.
Белгиланган тўлов миқдорининг камида 50 фоизи 1 январгача, 75 фоизи 1 апрелгача ва 100 фоизи 1 июлгача ёки олий таълим муассасаси ректори (филиал директори) томонидан узайтирилган муддатларгача тўланиши мумкин.
Хорижий фуқаролар тўловларни олий таълим муассасаси ректори (филиал директори) томонидан белгиланган муддатларгача амалга ошириши керак.
Табақалаштирилган тўлов-контракт (суперконтракт) асосида талабаликка тавсия этилган абитуриентлар учун ўқув йилининг биринчи ярми учун тўловларни амалга ошириш муддати ва миқдорлари Ўзбекистон Республикаси таълим муассасаларига ўқишга қабул қилиш бўйича Давлат комиссияси томонидан ва қолган қисми олий таълим муассасаси ректори (филиал директори) томонидан белгиланган муддатларгача амалга оширилади.
Изоҳ (0)