Россия ва Эрон АҚШдаги президентни сайлаш жараёнларига аралашишга уринмоқда. Бу ҳақда АҚШ Миллий разведкаси директори Жон Рэтклиффнинг Fox News’га берган интервьюсига таяниб, Meduza хабар берди.

Фото: Getty Images

Рэтклиффнинг сўзларига кўра, Эрон ва Россия сайловчиларнинг рўйхатдан ўтишига оид айрим маълумотларни қўлга киритган. Ушбу маълумотлар ёрдамида сайловчилар ўртасида «чалкашлик ва тартибсизликни юзага келтириш» мақсадида ёлғон ахборот тарқатилиши мумкин.

АҚШ Миллий разведкаси директорининг маълум қилишича, Эрон бунга қадар Дональд Трампга зарар етказиш мақсадида сайловчиларга таҳдидлар битилган сохта электрон мактубларни юборган. The Washington Post’нинг ёзишича, бу каби мактублар демократлар тарафдорларига келган.

«Россия томонидан бу каби ҳаракат амалга оширилганини кўрмаган бўлсак ҳам, улар 2016 йилдаги каби сайловчилар ҳақида айрим маълумотларни қўлга киритганини биламиз», — дейди Рэтклифф.

Шу йилнинг август ойида АҚШ миллий контрразведка маркази директори Уильям Эванина АҚШдаги президентлик сайловларига Россия, Эрон ва Хитой аралашишга уринаётганини маълум қилганди. Унинг сўзларига кўра, Россия Байденнинг, Эрон ва Хитой эса Трампнинг сайланишига йўл қўймасликка уриняпти.

Эслатиб ўтамиз, АҚШда президентлик сайловлари 2020 йилнинг 3 ноябрида бўлиб ўтади.

Республикачилар партияси 24 август куни президентлик ва вице-президентликка номзод сифатида Дональд Трамп ва Майкл Пенсни кўрсатган. Демократлар партияси эса АҚШ президенти сифатида Жо Байден, вице-президент сифатида Калифорния сенатори Камала Харрис номзодини илгари сурган.

Аввалроқ Трамп сайловларда ютқазса, ҳокимиятни тинч йўл билан топширмаслигини айтганди.