Боку илтимос қилса, Туркия «иккиланмасдан» Озарбайжонга аскарларини жўнатади ва ҳарбий кўмак беради. Бу ҳақда вице-президент Фуат Ўктай айтиб ўтди, деб ёзади «РБК».
Ўктайнинг аниқлик киритишича, Озарбайжон ҳукумати ҳозирча бундай илтимос билан мурожаат қилмаган.
Вице-президент CNN Turk телекомпаниясига берган интервьюсида, шунингдек, низони тартибга солиш учун тузилиб, Франция, Россия ва АҚШ томонидан бошқариладиган ЕХҲТ Минск гуруҳи фаолиятини ҳам танқид қилди.
Унинг сўзларига кўра, гуруҳ Қорабоғ масаласини ечимсиз қолдиришга ҳаракат қилмоқда ва Арманистонни ҳам сиёсий, ҳам ҳарбий жиҳатдан қўллаб-қувватламоқда.
Аввалроқ Арманистон бош вазири Никол Пашинян мамлакат аҳолисига қилган мурожаатида халқни қўлга қурол олиб, ватанни ҳимоя қилишга чақирган эди. «Асосий мақсадимиз охиригача курашиш ва халқимиз манфаатларини ҳимоя қилишдан иборат. Бугун Озарбайжон эгаллаб турган позиция биринчи навбатда қўлга қурол олиш ва ватанни ҳимоя қилишни тақозо этмоқда», — деди у.
Эслатиб ўтамиз, Тоғли Қорабоғдаги ҳарбий ҳаракатлар тинчликка эришиш учун қилинган иккита уринишга қарамасдан, 27 сентябрдан буён давом этмоқда. Озарбайжон ва Арманистон 10 октябрь куни соат 12:00 дан бошлаб Тоғли Қорабоғда ўт очишни тўхтатиш тўғрисида келишиб олганди. Аммо шу куни кейинроқ Арманистон ва Озарбайжон Мудофаа вазирликлари бир-бирини Тоғли Қорабоғда ўт очишни тўхтатиш режимини бузишда айблади.
19 октябрда Арманистон бош вазири Никол Пашинян ва Озарбайжон президенти Илҳом Алиев Тоғли Қорабоғдаги можаро бўйича музокаралар ўтказишга тайёрлигини маълум қилган. Кейинроқ Пашинян Тоғли Қорабоғда Россия учун бевосита хавф солувчи Сурия террорчилик гуруҳлари жангарилари бўлганлиги учун Москва у ерда аксилтеррорчилик операцияларини ўтказиш учун асосга эга эканлигини айтган.
Изоҳ (0)