Италияда коронавирус эпидемияси бошланганидан бери касалланишларнинг суткалик кўрсаткичи 15 мингтадан ошди. Бу ҳақда мамлакат Соғлиқни сақлаш вазирлиги ахборотига таяниб, «РИА Новости» хабар қилди.
Бир сутка ичида мамлакатда 15 199 кишида коронавирус инфекцияси аниқланди. Аввалги антирекорд 18 октябрда қайд этилган ва шу куни 11 705 та янги касалланиш ҳолати кузатилганди. Баҳорда касалланишлар сони бўйича антирекорд 21 мартда кузатилган ва шу куни 6557 кишида коронавирус инфекцияси борлиги аниқланганди.
Италия Соғлиқни сақлаш вазирлиги тақдим этган маълумотларга кўра мамлакатда эпидемия бошланганидан бери коронавирус юқтириб олганлар сони 449 648 нафарга етган. Энг юқори тўлқин Ломбардия провинциясида кузатилган, у ерда 4,1 мингтадан зиёд касалланиш ҳолатлари қайд этилган. Ҳудудда 21 октябрдан бошлаб комендантлик соати жорий қилинган.
Италияда инфекция асоратлари оқибатида охирги бир сутка давомида 127 киши вафот этган ва коронавирус қурбонларининг умумий сони 36 832 нафарга етган. Бир кун аввал 89 киши COVID-19 асоратлари туфайли оламдан кўз юмганди.
Мамлакатда 21 октябрь ҳолатига бир сутка давомида касалликдан тузалганлар сони 2369 нафарга кўпайган ва соғайганларнинг умумий сони 257 374 нафарга етган. Касалликлардаги беморлар сони 9 минг нафардан (603 киши қўшилди) ошган, интенсив терапия бўлинмаларида эса жами 926 нафар бемор (56 нафар қўшилган) даволанмоқда.
Европада коронавирус пандемиясининг иккинчи тўлқини сабаб қайта локдаун эълон қилган биринчи давлат Ирландия бўлган. Ирландияда одамларга 21 октябрдан 1 декабргача зарурат бўлмаган ҳолатларда ўз уйларидан 5 километр масофадан узоқда бўлиш тақиқлаб қўйилган.
Шунингдек, Словения, Уэльс каби давлатларда ҳам коронавирус тарқалишининг иккинчи тўлқини туфайли карантин чекловлари қатъийлашган.
Изоҳ (0)