Rossiya va Eron AQShdagi prezidentni saylash jarayonlariga aralashishga urinmoqda. Bu haqda AQSh Milliy razvedkasi direktori Jon Retkliffning Fox News’ga bergan intervyusiga tayanib, Meduza xabar berdi.
Retkliffning so‘zlariga ko‘ra, Eron va Rossiya saylovchilarning ro‘yxatdan o‘tishiga oid ayrim ma’lumotlarni qo‘lga kiritgan. Ushbu ma’lumotlar yordamida saylovchilar o‘rtasida “chalkashlik va tartibsizlikni yuzaga keltirish” maqsadida yolg‘on axborot tarqatilishi mumkin.
AQSh Milliy razvedkasi direktorining ma’lum qilishicha, Eron bunga qadar Donald Trampga zarar yetkazish maqsadida saylovchilarga tahdidlar bitilgan soxta elektron maktublarni yuborgan. The Washington Post’ning yozishicha, bu kabi maktublar demokratlar tarafdorlariga kelgan.
“Rossiya tomonidan bu kabi harakat amalga oshirilganini ko‘rmagan bo‘lsak ham, ular 2016-yildagi kabi saylovchilar haqida ayrim ma’lumotlarni qo‘lga kiritganini bilamiz”, — deydi Retkliff.
Shu yilning avgust oyida AQSh milliy kontrrazvedka markazi direktori Uilyam Evanina AQShdagi prezidentlik saylovlariga Rossiya, Eron va Xitoy aralashishga urinayotganini ma’lum qilgandi. Uning so‘zlariga ko‘ra, Rossiya Baydenning, Eron va Xitoy esa Trampning saylanishiga yo‘l qo‘ymaslikka urinyapti.
Eslatib o‘tamiz, AQShda prezidentlik saylovlari 2020-yilning 3-noyabrida bo‘lib o‘tadi.
Respublikachilar partiyasi 24-avgust kuni prezidentlik va vitse-prezidentlikka nomzod sifatida Donald Tramp va Maykl Pensni ko‘rsatgan. Demokratlar partiyasi esa AQSh prezidenti sifatida Jo Bayden, vitse-prezident sifatida Kaliforniya senatori Kamala Xarris nomzodini ilgari surgan.
Avvalroq Tramp saylovlarda yutqazsa, hokimiyatni tinch yo‘l bilan topshirmasligini aytgandi.
Izoh (0)