Словения эпидемия бошланганини эълон қилди, Уэльсда қатъий локдаун қайта бошланди

Европа давлатларида COVID-19 коронавирус инфекциясининг тарқалиши билан боғлиқ вазият тобора мураккаблашиб бормоқда. Словенияда ҳукумат мамлакат миқёсида эпидемия бошланганини эълон қилди, ҳудудлар бўйлаб ҳаракатланиш чекланди ва тунги вақтларда комендантлик соати жорий қилинди. Буюк Британия бирлашган қироллигининг Уэльс давлатида эса қатъий локдаун тартиби қайта ўрнатилди. Бу ҳақда «Korrespondent.net» хабар қилди.

Словенияда тунги вақтларда ҳаракатланишни тақиқлаш 20 октябрдан бошлаб кучга киради ва соат 21:00 дан 06:00 гача амалда бўлади. Ушбу чеклов ишга бориш ва фавқулодда вазиятларга тааллуқли эмас.

«Тақиқлар бошқа хориж мамлакатларининг тажрибалари асосида жорий этилди, лекин ушбу чекловлар эълон қилинганини асосий сабаби икки ҳафта давомида кузатилган касалланиш ҳолатларининг аксар қисмига одамларнинг бир-бирлари билан тунда ўзаро мулоқот қилгани, оқшом зиёфатларини уюштиргани, ресторанларга боргани ва бошқа тадбирлар сабаб бўлган», – деган мамлакат ички ишлар вазири Алеш Хойс.

Шунингдек, Словенияда сешанбада тун ярмигача ҳудудлараро ҳаракатланиш ҳам тақиқланган. Ҳудуддан ҳудудга ўтишга хўжалик, ўрмон ва ёки шунга ўхшаш бошқа фаолият тури билан шуғулланувчи, инсон ҳаёти ва шахсий мулкка хавф солувчи вазиятларни бартараф этувчи, ёши кекса одамларга ёрдам берувчи, тиббиёт хизматлари ёки дорихоналар, фавқулодда вазиятлар ҳамда суд топшириқларини бажариш ёхуд ўзгача эҳтиёжга эга шахсларга истисно тариқасида рухсат берилади.

Бундан ташқари, жамоат жойларида тўпланганларга нисбатан ҳам кескин чора кўрилади. Очиқ ҳавода тўпланишига рухсат этиладиган одамлар сони 10 нафардан 6 нафаргача қисқарди. Бунда бир оиланинг аъзоларига истисно тариқасида рухсат берилади.

Уэльсда эса 17 кунга қатъий карантин тартиби ўрнатилган ва март ойидаги чекловлар яна қайта жорий қилинди.

Чакана савдонинг иккинчи даражали корхоналари ёпилган, дам олиш ва меҳмонхона бизнеси вақтинча тўхтаган, ресторанлар ва барлар, жамоат марказлари ва кутубхоналар, шунингдек, маданият масканларининг фаолиятида ҳам танаффус эълон қилинган. Бироқ тўйлар ва дафн маросимларининг ўтказилишига рухсат берилмоқда.

Ҳукумат муҳим соҳаларда хизмат қилувчилардан бошқаларнинг уйдан туриб масофадан ишлаши лозимлигини таъкидламоқда. Ёпиқ иншоотларда ҳам, очиқ ҳавода ҳам бир-бирига бегона кишиларнинг ҳар қандай турдаги учрашувлари тақиқланган.

Бошланғич мактаблар чорак ярмидан кейин яна қайта очилади, ўрта мактабларда эса фақат 7 ва 8-синф ўқувчилари анъанавий усулда таълим олади.

Аввал Варшавада COVID-19 беморлари учун иккита вақтинчалик касалхона қурилиши хабар қилинган. Охирги кунларда Польша ва Европанинг бошқа мамлакатларида коронавирусга чалиниш бўйича суткалик антирекорд тез-тез янгиланиб турибди.