Испания шимолидаги автоном вилоят ҳисобланадиган Наварра ҳудудида коронавирус тарқалишини тўхтатиш учун маҳаллий расмийлар ҳудудга кириш ва чиқишни бутунлай тўхтатишга қарор қилди. Бу ҳақда Meduza хабар берди.
Наваррага кириш ва чиқишга иш, ўқишга бораётганлар, қариндошиникидан кетаётганларга ва бошқа кечиктириб бўлмайдиган ҳолатдаги кишиларга рухсат этилади. Чекловлар 22 октябрдан кучга киради ва 14 кун, яъни 4 ноябргача амалда бўлади.
Қайд этилишича, Наварра Испаниядаги кириш ва чиқишни тўлиқ ёпишга қарор қилган биринчи вилоят бўлди. Аввалроқ Испанияда фақат алоҳида шаҳарлар ёпилганди, бироқ бу ҳолат вилоятлар учун юз бермаганди.
Шунингдек, 19 октябрь куни Испаниянинг бошқа ҳудудлари ҳам коронавирусга қарши чекловларни эълон қилган. Кастилия-Леон автоном вилоятидаги Бургос, Аранда-де-Дуэро шаҳарлари ёпилади. Арагон шаҳрида барлардаги ташриф буюрувчилар сонини чеклаш ва дўконларда тунда спиртли ичимлик сотишни тақиқлаш ҳақида қарор қабул қилинган, Каталонияда эса тун-у кун ишлайдиган компанияларга соат 22:00 дан 07:00 гача ишлаш тақиқланди.
Испанияда 19 октябрь ҳолатига кўра, 974 449 кишида коронавирус аниқланган, улардан қарийб 34 минг нафари вафот этган. Испания касалланганлар сони бўйича Ғарбий Европада етакчи ҳисобланади ва бутун дунёда олтинчи ўринни эгаллаб турибди.
Изоҳ (0)