Yevropa davlatlarida COVID-19 koronavirus infeksiyasining tarqalishi bilan bog‘liq vaziyat tobora murakkablashib bormoqda. Sloveniyada hukumat mamlakat miqyosida epidemiya boshlanganini e’lon qildi, hududlar bo‘ylab harakatlanish cheklandi va tungi vaqtlarda komendantlik soati joriy qilindi. Buyuk Britaniya birlashgan qirolligining Uels davlatida esa qat’iy lokdaun tartibi qayta o‘rnatildi. Bu haqda “Korrespondent.net” xabar qildi.
Sloveniyada tungi vaqtlarda harakatlanishni taqiqlash 20-oktabrdan boshlab kuchga kiradi va soat 21:00 dan 06:00 gacha amalda bo‘ladi. Ushbu cheklov ishga borish va favqulodda vaziyatlarga taalluqli emas.
“Taqiqlar boshqa xorij mamlakatlarining tajribalari asosida joriy etildi, lekin ushbu cheklovlar e’lon qilinganini asosiy sababi ikki hafta davomida kuzatilgan kasallanish holatlarining aksar qismiga odamlarning bir-birlari bilan tunda o‘zaro muloqot qilgani, oqshom ziyofatlarini uyushtirgani, restoranlarga borgani va boshqa tadbirlar sabab bo‘lgan”, – degan mamlakat ichki ishlar vaziri Alesh Xoys.
Shuningdek, Sloveniyada seshanbada tun yarmigacha hududlararo harakatlanish ham taqiqlangan. Hududdan hududga o‘tishga xo‘jalik, o‘rmon va yoki shunga o‘xshash boshqa faoliyat turi bilan shug‘ullanuvchi, inson hayoti va shaxsiy mulkka xavf soluvchi vaziyatlarni bartaraf etuvchi, yoshi keksa odamlarga yordam beruvchi, tibbiyot xizmatlari yoki dorixonalar, favqulodda vaziyatlar hamda sud topshiriqlarini bajarish yoxud o‘zgacha ehtiyojga ega shaxslarga istisno tariqasida ruxsat beriladi.
Bundan tashqari, jamoat joylarida to‘planganlarga nisbatan ham keskin chora ko‘riladi. Ochiq havoda to‘planishiga ruxsat etiladigan odamlar soni 10 nafardan 6 nafargacha qisqardi. Bunda bir oilaning a’zolariga istisno tariqasida ruxsat beriladi.
Uelsda esa 17 kunga qat’iy karantin tartibi o‘rnatilgan va mart oyidagi cheklovlar yana qayta joriy qilindi.
Chakana savdoning ikkinchi darajali korxonalari yopilgan, dam olish va mehmonxona biznesi vaqtincha to‘xtagan, restoranlar va barlar, jamoat markazlari va kutubxonalar, shuningdek, madaniyat maskanlarining faoliyatida ham tanaffus e’lon qilingan. Biroq to‘ylar va dafn marosimlarining o‘tkazilishiga ruxsat berilmoqda.
Hukumat muhim sohalarda xizmat qiluvchilardan boshqalarning uydan turib masofadan ishlashi lozimligini ta’kidlamoqda. Yopiq inshootlarda ham, ochiq havoda ham bir-biriga begona kishilarning har qanday turdagi uchrashuvlari taqiqlangan.
Boshlang‘ich maktablar chorak yarmidan keyin yana qayta ochiladi, o‘rta maktablarda esa faqat 7 va 8-sinf o‘quvchilari an’anaviy usulda ta’lim oladi.
Avval Varshavada COVID-19 bemorlari uchun ikkita vaqtinchalik kasalxona qurilishi xabar qilingan. Oxirgi kunlarda Polsha va Yevropaning boshqa mamlakatlarida koronavirusga chalinish bo‘yicha sutkalik antirekord tez-tez yangilanib turibdi.
Eslatib o‘tamiz, dunyoda koronavirusga chalinganlar soni 30-avgustda 25 million, 11-sentabrda 28 million, 14-sentabrda 29 million, 18-sentabrda 30 million, 21-sentabr kuni 31 million, 5-oktabr kuni 35 million, 11-oktabr kuni 37 million, 14-oktabr kuni 38 million, 19-oktabrda 40 million kishidan oshdi.
Izoh (0)