Қирғизистон Олий суди Садир Жапаровни ҳокимиятни куч билан эгаллашга уриниш иши бўйича оқлади

Қирғизистон Олий суди президент вазифасини бажараётган мамлакат бош вазири Садир Жапаровга нисбатан жиноят ишини қайта кўриб чиқди, деб хабар бермоқда «Интерфакс».

«Олий суд ҳайъати 2012 йилда ҳокимиятни куч билан эгаллаб олишга уриниш иши айблови бўйича ишни қайта кўриб чиқди. Садир Жапаров жиноят таркиби бўлмагани сабабли оқланди», — дея маълум қилишди судда.

Суд матбуот хизматига кўра, шунингдек, ушбу иш бўйича депутат Талант Мамитов ва Қирғизистон давлат миллий хавфсизлик қўмитаси раиси Қамчибек Ташиев ҳам оқланган.

«Олий суднинг 2013 йил 6 августдаги қарори бекор қилинди. Олий суд ҳайъати Бишкек шаҳар судининг 2013 йил 17 июндаги оқлов ҳукмини кучда қолдирди», — дея таъкидланди судда.

Садир Жапаров 2012 йилда «Ата-Журт» партиясининг парламентдаги фракцияси етакчиси бўлган вақтда парламентнинг ўша вақтдаги вице-спикери Талант Мамитов ва депутат Қамчибек Ташиев билан бирга мухолифат намойиши вақтида парламент биноси панжарасини штурм қилишга урингани учун ҳибсга олинган эди.

Прокуратура уларни «ҳокимиятни куч билан эгаллаб олишга уриниш»да айблаб, уларга нисбатан 10 йилга озодликдан маҳрум этиш жазосини тайинлашни талаб қилган. Бироқ Бишкек шаҳар суди депутатларни тўлиқ оқлаган. Кейинроқ Олий суд мухолифатчиларга 1 йилдан 1,5 йилгача озодликдан маҳрум этиш жазосини тайинлаган ва жазо муддати амалда ўтаб бўлингани сабабли уларни суд залидан озод этган. Суд қарори Қирғизистон Марказий сайлов комиссиясига айбланувчиларни депутатлик мандатларидан маҳрум қилиш имконини берган.

Аввалроқ Қирғизистон президенти вазифасини бажарувчи Садир Жапаров қонунчиликка ўзгартириш киритилса, президент сайловларида иштирок этишга тайёрлигини айтган эди.

Эслатиб ўтамиз, 15 октябрь куни Жээнбеков 10 кун давом этган норозилик намойишларидан кейин Қирғизистон президентлиги лавозимидан истеъфо берганди. 16 октябрь куни парламент мажлисида қонунчилик кенгаши спикери Канат Исаев давлат раҳбарининг вазифаларини вақтинча бажаришни рад этган. Якунда бош вазир Садир Жапаров президент вазифасини бажарувчига айланди.

Дастлабки маълумотларга кўра, президентликка сайловлар 17 январь куни бўлиб ўтади.