Греция Туркия билан қуруқликдаги чегараси Эврос вилоятида Евроиттифоқ ҳудудлари чегараларини мустаҳкамлаш учун девор қуради. Бу ҳақда Греция ҳукуматининг расмий вакили Стелиос Петсас маълум қилган, деб ёзмоқда «Korrespondent.net».
«Айни вақтда чегарада 26 километр узунликдаги янги тўсиқ ўрнатилмоқда ва 10 километр узунликдаги эски участкалар қайта таъмирланмоқда. Янги деворнинг қурилиши мамлакатнинг суверен ҳуқуқлари ҳимоясига хизмат қилади ва Грециянинг Европа ташқи чегараларини муҳофаза қилишга тайёрлигини ифодаловчи ўзига хос ишора бўлади», — деган Петсас.
Шунингдек, ҳукумат вакили бош вазир Кириакос Мицотакиснинг Эвросга бориб, ҳолатни кўздан кечирганини эслатган.
«Сўнгги кунларда бош вазир чегараларнинг самарали ҳимоя қилинишини таъминлаш, чекка ҳудудларда яшовчи аҳолини қўллаб-қувватлаш мақсадида Эвросда бўлди. У маҳаллий ҳокимлик органларининг вакиллари билан учрашди ва 2021 йил апрель ойида қуриб битказиладиган девор ҳақида қўшимча маълумотларга эга бўлди», – деган Петсас.
Греция ҳукумати вакили деворнинг асосий ҳимоя функциясидан ташқари яна қўшимча имкониятлар бериши ҳақида ҳам гапирган, деворнинг сел ва сув тошқинлари вақтида ҳам асқатиши, Эвроснинг геоморфологиясига ҳам муносиб экани, бошқа томондан олиб қараганда эса, қишлоқ хўжалиги маҳсулотларини етиштиришда ҳам қўл келишини эслатган.Шунингдек, у Эвросдаги чегараларни қўриқлашга 400 нафар янги, доимий чегарачи қўшилиши, яна 800 нафар аскар Эгей денгизининг шарқий қисмига жалб қилиниши, 480 нафар чегарачи эса мамлакатнинг қолган қисмида бўлишини қўшимча қилган.
«Бир йил давомида жами 1680 нафар чегарачи кучайтирилган полициянинг бўлиши тақозо этиладиган ҳудудларга жалб этилади», – деган Петсас.
Изоҳ (0)