Сергей Собянин ўзининг блоги орқали Москва шаҳри расмийлари коронавирус тарқалишига қарши қандай курашмоқчи эканлиги тўғрисидаги саволларга жавоб қайтарди.
Собянин яна бир бор коронавирус билан янги касалланиш ҳолати ортаётганига қарамай, мэрия комендантлик соати, шаҳар бўйлаб ҳаракатни тўлиқ тақиқлаш, кириш ва чиқишни тўхтатиш, деярли барча корхоналарни ёпиш каби кескин чораларни қўллашга тайёр эмаслигини таъкидлаган. Собянин бу каби чекловларни «мутлақо имконсиз ва номақбул» деб атаган.
Москва мэрининг фикрича, оптимал стратегия шаҳарни ёпиш ва чекловчи чоралардан тўлиқ воз кечиш ўртасидаги оралиқ йўлни топишдан иборат.
Ушбу стратегия доирасида 65 ёшдан катта бўлган инсонлар, сурункали касаллиги бор фуқаролар, юқори синф ўқувчилари, айрим талабалар учун чеклов киритилган, баъзи корхоналар ўз ходимларини масофадан туриб ишлатишга ўтган. Собяниннинг сўзларига кўра, жами 6,5 миллион киши, яъни Москванинг 50 фоиз аҳолиси уйда қолмоқда ёки касалланиш хавфисиз ишга қатнамоқда.
Шу билан бирга, Собянин Москвада COVID-19 билан янги касалланиш ҳолатлари ортаётганига изоҳ беришга уринган. Мернинг ёзишича, бу шаҳарда «Россиянинг бошқа вилоятига қараганда 10 баробар кўпроқ одам» истиқомат қилиши ва вирусни аниқлаш бўйича тестлар кўп ўтказилаётгани билан боғлиқ.
Шунингдек, у Москва коронавирус билан касалланиш ҳолатлари бўйича Россияда биринчи ўринда кетаётгани, бироқ беморларнинг шифохонага ётқизилиши ва коронавирус пневмонияси бўйича 30—40-ўринларда эканлигини айтган. «Шунга қарамай, бу бизни тинчлантирмаяпти», — дея қўшимча қилади Москва мэри.
19 октябрь маълумотларига кўра, Москвада пандемия бошланганидан буён коронавирусга чалинган 6009 киши вафот этган. Ҳозирга қадар Россия пойтахтида 362 мингдан ортиқ одамда COVID-19 тасдиқланган.
Изоҳ (0)