18 октябрь куни Озарбайжон Мудофаа вазирлиги Арманистон Қуролли кучлари гуманитар мақсадларда ўт очишни тўхтатиш бўйича янги режимни бузганлигини маълум қилди, деб ёзади «Интерфакс».
«18 октябрь 00:00 дан бошлаб гуманитар мақсадларда ўт очишни тўхтатиш бўйича янги режим эълон қилинганига қарамай, Арманистон ҚК яна бир марта битимни қўпол равишда бузди. Тун давомида рақиб томондан Жаброил шаҳар атрофлари, шунингдек, ушбу ҳудуддаги истилодан озод этилган Араз дарёси бўйлаб жойлашган қишлоқлар миномёт ва артиллериядан ўққа тутилди. Шахсий таркибда талафотлар йўқ», — дейилади Мудофаа вазирлиги хабарида.
Муассаса маълумотларига кўра, Озарбайжон армияси бўлинмалари муносиб жавоб чораларини кўрган.
Тоғли Қорабоғ Мудофаа вазирлиги хабар беришича, Озарбайжон Қуролли кучлари 18 октябрь куни эрталаб фронтнинг жанубий йўналишида ҳужумга ўтган.
«Гуманитар мақсадларда ўт очишни тўхтатиш бўйича янги режим эълон қилинганига қарамай, Озарбайжон ҚК яна бир марта битимни қўпол равишда бузди. Соат 7:20 га келиб (Тошкент вақти билан 8:20) артиллериядан фойдаланиб, рақиб манфаатли позицияларни эгаллаш мақсадида жанубий йўналишда ҳужум бошлади. Иккала томон ҳам талафот кўрмоқда, ҳалок бўлганлар ва ярадорлар бор», — дейилади Қорабоғ Мудофаа вазирлиги хабарида.
Икки томон ўртасидаги сулҳ 18 октябрь куни маҳаллий вақт билан ярим тунда (Тошкент вақти билан 1:00) амал қилишни бошлаган эди.
Аввалроқ Туркия Тоғли Қорабоғдаги можарони олдиндан режалаштирганликда айбланган эди.
Эслатиб ўтамиз, Тоғли Қорабоғда кенг қамровли жанговар ҳаракатлар 27 сентябрдан буён давом этмоқда. Озарбайжон ва Арманистон 10 октябрь куни соат 12:00 дан бошлаб Тоғли Қорабоғда ўт очишни тўхтатиш тўғрисида келишиб олганди. Аммо шу куни кейинроқ Арманистон ва Озарбайжон Мудофаа вазирликлари бир-бирини Тоғли Қорабоғда ўт очишни тўхтатиш режимини бузишда айблади.
Мавзуга доир: Тоғли Қорабоғдаги низо — суратларда
Изоҳ (0)