АҚШда ҳомиладор аёлни ўлдиришда ва унинг боласини ўғирлашда айбдор деб топилган 52 ёшли Лиза Монтгомери қатл этилади. Бу ҳақда АҚШ Адлия вазирлигига таяниб, Meduza хабар қилди.
Маълум қилинишича, 2004 йилда Монтгомери кучук сотиб олиш баҳонасида Миссури штати фуқароси Бобби Жо Стиннетт уйига ташриф буюради. Уйга кирган Монтгомери Стиннеттни бўғиб ўлдиради ва унинг қорнини кесиб, боласини ўғирлаб кетади.
Монтгомери жиноятда айбини тан олди. Судда жиноятчининг адвокатлари унда галлюцинация ва ёлғон ҳомиладорлик синдроми (псевдоциез) борлигини таъкидлади.
Монтгомери 2007 йилда ўлимга олиб келган одам ўғирлаш учун ўлимга маҳкум этилган. Аёл Индиана штати Терре-Хот шаҳридаги қамоқхонада махсус инъекция ёрдамида қатл этилади. Қатл 8 декабрга режалаштирилган.
Монтгомерининг қилмиши федерал даражадаги жиноят ҳисобланади. Бундай жиноятлар учун жазо тайинлаш мамлакат федерал ҳокимияти ваколатига киради.
Эслатиб ўтамиз, федерал ўлим жазоси АҚШда 2020 йил июль ойида 17 йиллик танаффусдан сўнг қайта тикланди. Reuters хабарига кўра, Монтгомери 1953 йилдан бери федерал ҳукумат томонидан қатл этилган биринчи аёл бўлади. Аёлларни штатлар ҳокимияти томонидан қатл этиш 1953 йилдан кейин ҳам давом этган.
Аввалроқ АҚШ федерал ҳукумати илк бор ҳинду миллатига мансуб шахсни қатл этгани хабар қилинганди.
Изоҳ (0)