Германия президенти Франк-Вальтер Штайнмайер 17 октябрь куни тан соқчисида коронавирус аниқланганидан кейин карантинга олинди. Бу ҳақда давлат раҳбари девони матбуот хизматига асосланиб, «РБК» хабар қилди.
Энди 64 ёшли Штайнмайер ўз-ўзини яккалаш режимига ўтади. У коронавирус таҳлили учун тестдан топширди, лекин ҳали натижалар маълум эмас.
Эслатиб ўтамиз, март ойи охирида Германия канцлери Ангела Меркель карантинга олинган эди. COVID-19 таҳлили учун топширган тести манфий натижа кўрсатгандан сўнг канцлер 3 апрелда ўз ишига қайтди.
Сентябрь ойи охирида Меркель Германия фуқароларини коронавирус инфекцияси кўпайиши сабабли келаётган куз ва қиш ойлари мамлакат учун осон бўлмайди, деб огоҳлантирди.Шу билан бирга, у федерал органлар қатъий чекловлар ва умумий карантин жорий қилишни истамаслигини ҳамда касаллик ўчоқларида мақсадли чоралар билан чекланишга ҳаракат қилишини таъкидлади.
Германия Соғлиқни сақлаш вазирлигининг маълумотларига кўра, 17 октябрга қадар мамлакатда эпидемия бошланганидан бери 356 мингдан ортиқ коронавирус билан касалланиш ҳолатлари аниқланган. Шу давр мобайнида беморларнинг 9,7 минг нафари вафот этган.
Изоҳ (0)