Буйрак касалликлари коронавирус инфекциясидан вафот этиш хавфини икки мартадан кўпроқ оширади. Бу ҳақда Буюк Британия олимларининг Anaesthesia журналида эълон қилинган тадқиқотлари натижаларида айтилади, деб ёзади «РБК».
Мутахассислар 10 мартдан 23 июнгача бўлган вақт оралиғида Лондон ва Бирмингемдаги тўртта касалхона реанимация бўлимларига COVID-19 билан ётқизилган 372 нафар беморга оид маълумотларни ўрганиб чиқди.
216 нафар беморда сурункали ёки инфекция оқибатида келиб чиққан муаммолар бўлган. Улардан 107 киши (50 фоизи) вафот этган. Буйрагида муаммо бўлмаган қолган 156 бемордан эса 32 нафари (21 фоизи) вафот этган.
Тадқиқотчилар тахмин қилишича, ўлимга олиб келиш эҳтимоли вируснинг организмга умумий таъсирига, инфекцияни даволашда заҳарли воситалардан фойдаланишга, шунингдек, ўпка ва буйрак ўртасидаги бир йўла бир нечта томондан боғлиқликка алоқадор.
Аввалроқ Ливерпуль университети олимлари грипп ва коронавирус билан кетма-кет касалланиш ҳам ўлимга олиб келиш хавфини оширишини айтган эди.
Эслатиб ўтамиз, дунё бўйича коронавирус инфекцияси асоратлари оқибатида вафот этганлар сони 1,1 миллион кишидан ошди.
Аввалроқ Жаҳон соғлиқни сақлаш ташкилоти (ЖССТ) раҳбари Тедрос Гебрейесус дексаметазон – COVID-19’га қарши курашда самарали экани исботланган ягона дори воситаси эканлигини маълум қилган эди.
Изоҳ (0)