Хитой шаҳарларидан бирида аҳоли шошилинч равишда COVID-19’га қарши эмланади

Хитойнинг Чжэцзян шарқий провинциясидаги Цзясин шаҳрида клиник синовларнинг учинчи босқичидаги Sinovac препарати билан COVID-19’га қарши шошилинч равишда эмлаш эълон қилди, деб хабар бермоқда «Интерфакс» Хитойнинг Paper газетасига таяниб.

Қайд этилишича, шаҳар маъмурияти вакцинани Sinovac’дан марказлашган ҳолда буюртма қилган бўлиб, эндиликда аста-секин белгиланган эмлаш жойларига етказиб бермоқда.

«Агар пандемия ва яқинлашиб келаётган қиш-баҳор даври бўлмаганида эди, вакцина бозорда пайдо бўлганидан кейингина ушбу эмлаш тўғрисида эълон қилинарди деб ўйлайман», — дея ходимнинг сўзларини келтирган газета.

Нашр суҳбатдошининг сўзларига кўра, фавқулодда вакцинани биринчи навбатда олувчилар  шифокорлар, чегара назорати ходимларидир. Шунингдек, жамоат жойларида ишлайдиган ёки юқори ёки ўртача хавф остида коронавирусга чалиниш мумкин бўлган давлатларда бўлган шахслар учун ҳам биринчи навбатда эмлаш тавсия этилади.

Эмлаш фақат ихтиёрий равишда 18 ёшдан 59 ёшгача бўлганларда амалга оширилади.

Аввалроқ Хитойда COVID-19’га қарши оммавий эмлаш бошлангани, Хитойнинг Шандун шарқий провинциясидаги Циндао шаҳри маъмурлари беш кун ичида шаҳарнинг барча 9,5 миллион аҳолисини коронавирусга қарши текширишга қарор қилгани хабар берилган эди.