Австрия ташқи ишлар вазири Александр Шалленбергда коронавирус тасдиқланди. Шу ҳафтада у Бельгия ТИВ раҳбари Софи Вильмес билан мулоқот қилган бўлиб, унда ҳам COVID-19 борлиги тасдиқланди. Бу ҳақда «Korrespondent.net» Австрия ТИВ вакилига таяниб хабар бермоқда.
Шалленберг 12 октябрь куни Люксембургда бўлиб ўтган Европа иттифоқи Ташқи ишлар кенгаши мажлисида вирусни юқтириб олган бўлиши тахмин қилинмоқда.
Австрия вазирида коронавирус касаллиги симптомлари йўқ. Вирус режали текширув чоғида аниқланган.
Бельгия ташқи ишлар вазири таъкидлашича, уйдан ташқарида қўллаган эҳтиёт чораларини ҳисобга олганда, унга вирус оила аъзоларининг биридан юққан бўлиши мумкин. Бу ҳақда у ўз Twitter’ида ёзган. Софи Вильмес ҳеч кимнинг коронавирусга чалинмаслиги кафолатланмаганини қўшимча қилиб, обуначиларини бир-бирини эҳтиёт қилишга чақирди.
Эслатиб ўтамиз, Францияда ўтган бир кеча-кундузда 32,4 мингдан ортиқ киши коронавирусга чалинди, бу рекорд кўрсаткич ҳисобланади. Аввалроқ Германия президенти Франк-Вальтер Штайнмайер 17 октябрь куни тан соқчисида коронавирус аниқланганидан кейин карантинга олинган эди.
Изоҳ (0)