Picodi портали таҳлилчилари тадқиқот ўтказиб, дунёнинг қайси мамлакатида яшовчи аҳоли Apple’нинг янги маҳсулоти — 128 гигабайтли iPhone 12 Pro версияни харид қилиш имконига эга эканлигини аниқлади. Экспертлар гаджет нархини ўнлаб мамлакатлардаги аҳолининг ўртача иш ҳақи билан таққослаган.
Девайснинг расмий нархи 1099 долларни ташкил этади.
Швейцарияликлар iPhone 12 Pro харид қилиши учун 4,4 кун, америкаликлар 6,1 кун, Австралия аҳолиси эса 6,6 кун ишлаши лозим. Польшалик фуқаро янги iPhone’ни харид қилиши учун 28,3 кун ишлаши лозим бўлса, россияликларда ушбу кўрсаткич 47,5 кунга тенг.
Ҳиндистон ва Мексиканинг ўртача статистик аҳолиси iPhone 12 Pro учун 54,4 кун ишлаши керак бўлади.
«iPhone 2020 индекси» iPhone 12’нинг расмий нархи асосида ҳисоблаб чиқилган. Мамлакатларнинг ўртача иш ҳақи эса миллий статистика бошқармалари сайтидан ёки тегишли вазирликлар томонидан эълон қилинган маълумотлардан олинган.
Давлат статистика қўмитасининг июль ойидаги маълумотларига кўра, Ўзбекистонда ўртача ойлик номинал ҳисобланган иш ҳақи 2,5 миллион сўмни ташкил этган. Демак, шу каби ойликда ишлайдиган ўзбекистонлик янги iPhone харид қилиши учун 136 кун (4,5 ой) ишлаши лозим.
Эслатиб ўтамиз, Apple октябрь ойидаги тақдимотида тўртта янги смартфонини намойиш этди: iPhone 12 Mini, iPhone 12, iPhone 12 Pro ва iPhone 12 Pro Мах. Барча гаджетлар компаниянинг А14 Bionic процессорига эга бўлган. Ишлаб чиқарувчининг таъкидлашича, бу ҳозирги кунда бозорда мавжуд энг кучли мобил процессор ҳисобланади.
Изоҳ (0)