Apple октябрь ойи тақдимотида тўртта смартфондан иборат iPhone 12 линейкасини тақдим этди. Компания янгиланган дизайн ва замонавий функциялардан ташқари қурилма жамланмасига ҳам ўзгартириш киритди. Эндиликда янги гаджетнинг қутисида фақат USB-C — Light’нинг кабели мавжуд. Наушник ва адаптер эса олиб қўйилган. Шу сабабли эски девайсникидан фойдаланишга ёки алоҳида харид қилишга тўғри келади, деб ёзади Hi-Tech.Mail.ru.
Компания ўзининг мазкур қарорини экология тўғрисида қайғураётгани билан изоҳлаган. Олиб қўйилган жамланмалар смартфон қутиси ўлчамининг кичрайишига сабаб бўлади, бу эса уларни утилизация қилишда зарарли чиқиндиларнинг ҳавога тарқалишини камайтиради. Шунингдек, бу электрон чиқиндилар даражасини ҳам пасайтиришга хизмат қилади. Apple’нинг ҳисоб-китобларига кўра, бу каби ўзгариш карбонат ангидриднинг йилига 2 миллион тонна ҳавога чиқишини қисқартиради. Бу худди ҳар йили йўллардан 450 мингта автомобилни олиб ташлашдек гап.
Бу каби ўзгартиш фақатгина янги флагманларга тегишли эмас. Компания ўзининг «яшил» усулини ҳозирда сотувда қолган эски смартфонларга ҳам жорий этган. Гап iPhone 11, iPhone ХР ва iPhone SЕ ҳақида кетмоқда.
Ишлаб чиқарувчи ҳозирча фақат смартфонларнинг қувватлантириш қурилмаларини олиб қўйган. iPad планшетлари ва MacBook ноутбуклари тўлиқ жамланма билан сотилмоқда.
Аввалроқ Apple тўртта iPhone 12 смартфони тақдимотини ўтказгани, линейкадаги барча смартфонлар 5G алоқа тармоғини қўллаб-қувватлаши тўғрисида хабар берилганди.
Изоҳ (0)