Apple октябрь ойидаги тақдимотида тўртта янги смартфонини намойиш этди: iPhone 12 Мини, iPhone 12, iPhone 12 Pro ва iPhone 12 Pro Мах. Барча гаджетлар компаниянинг А14 Bionic процессорига эга бўлган. Ишлаб чиқарувчининг таъкидлашича, бу ҳозирги кунда бозорда мавжуд энг кучли мобил процессор ҳисобланади, деб ёзади Hi-Tech.Mail.ru.
Интернетда AnTuTu бенчмаркининг iPhone 12 ва iPhone 12 Pro’га оид скриншотлари пайдо бўлди. Натижалар кутилганидек эмас.
iPhone 12’нинг 4 гигабайт тезкор ва 256 гигабайт ички хотирага эга модификацияси тестдан ўтказилган. Смартфон жами 564 899 баллни қўлга киритган. Бунда 157 894 процессорнинг ишлаш тезлигига, 201 085 балл график тезлаштиргичга, 105 677 хотирага ва 90 243 балл UХ-тестига берилган.
6 гигабайт тезкор ва 256 гигабайт ички хотирага эга iPhone 12 Pro эса жами 572 213 балл тўплаган. Уларнинг 167 437 балли процессорга, 196 812 балли — график ядрога, 114 463 — хотирага ва 93 422 — UХ-тестга берилган. iPhone 12 каби Pro версия ҳам iOS 14.1 операцион тизимида ишлайди.
Скриншотларга кўра, тасвирлар дастлаб Хитойнинг Weibo ижтимоий тармоғида пайдо бўлган. Уларнинг ҳақиқийлигини исботлашнинг имкони йўқ. AnTuTu маълумотлар ҳақиқатга мос келса-да, бенчмарк деярли ҳеч қачон смартфонларнинг реал ишлашини ифодаламайди. AnTuTu’нинг расмий сайтида янги қурилма ҳақида ҳозирча ҳеч нарса йўқ.
Эътиборли жиҳати, iPhone 12’нинг иккала версияси ҳам Snapdragon 865 процессоридан ишлайдиган смартфонлардан пастроқ кўрсаткични намоён этган. MySmartPrice муаллифлари буни тезкор хотира таъсирининг бузилиши билан изоҳламоқда. Базавий iPhone 12 4 гигабайт, Pro-версия — 6 Гб тезкор хотирага эга. Android’да ишлайдиган аксарият флагман смартфонлар ҳозирда 8/12 гигабайт тезкор хотирага эга бўлмоқда, масалан, Samsung Galaxy S20 ва Galaxy S20 Ultra.
Изоҳ (0)