АҚШ президенти Дональд Трамп унда COVID-19’га нисбатан иммунитет пайдо бўлгани сабабли, сайловчиларни ўпиб-ўпиб олишга ваъда берди, деб ёзади «РИА Новости».
«Менда ҳозир иммунитет бор. Минбардан тушиб, ҳаммани ўпиб-ўпиб олишим мумкин. Ҳаммани — эркакни ҳам, аёлни ҳам ўпаман. Анави йигитга қаранг, қандай ёқимтой. Уни ҳам ўпаман. Бундан ҳузур қилмайман, албатта, аммо бу нормал ҳолат», — деди Трамп Пенсильванияда ўз тарафдорлари қаршисида нутқ сўзларкан.
Олимлар фикрича, COVID-19 билан оғриб ўтган одам, ҳақиқатан ҳам, иммунитетга эга бўлади, аммо иммунитет маълум бир вақтгина сақланиб қолиши мумкин. Шунингдек, иммунитети бор одам вируснинг бошқа одамларга юқишида воситачилик қилиш-қилмаслиги ҳам охиригача ўрганилмаган.
Аввалроқ АҚШ президенти Дональд Трампнинг коронавирусга топширган сўнгги тестлари натижаси салбий чиққани хабар берилган эди.
Эслатиб ўтамиз, Дональд Трамп ва унинг рафиқаси Меланияда 2 октябрь куни коронавирусга топширган тест жавоби ижобий чиққан. Сўнг у Уолтер Рид номидаги миллий ҳарбий тиббиёт марказида даволанган. Шон Конлининг маълум қилишича, Трампнинг организмида кислород даражаси 93 фоизгача тушиб кетганидан сўнг дексаметазон қўлланилган. Шифокорлар стероидни 3 октябрь куни ремдесивир препаратининг иккинчи дозаси билан бирга қўллашни бошлаган, Трампда иккиламчи таъсирлар аниқланмаган.
Изоҳ (0)