Trampni davolayotgan shifokor testlar AQSh prezidentida koronavirus yo‘qligini ko‘rsatganini ma’lum qildi

AQSh prezidenti Donald Trampning koronavirusga topshirgan so‘nggi testlari natijasi salbiy chiqdi. Bu haqda mamlakat rahbarini davolayotgan shifokor Shon Konliga tayanib, Oq uy matbuot kotibi Keyli Makineni ma’lum qildi.

Antitana, RNK va PZR-tadqiqotlar va boshqa qator testlar Amerika yetakchisida virus yo‘qligini ko‘rsatgan. “Uning testlari ketma-ket bir necha kundan buyon salbiy chiqmoqda”, — deydi Konli.

Avvalroq AQSh prezidenti Donald Tramp koronavirusga qarshi qabul qilayotgan dorilar uning ruhiy sog‘lig‘iga va qarorlarining munosibligiga, xususan, yadro qurolini qo‘llash to‘g‘risidagi qaroriga ta’sir o‘tkazishi mumkinligi to‘g‘risida xabar berilgandi. Ekspertlar fikriga ko‘ra, kasallikni yuqtirganidan keyin Oq uy rahbarining oldindan aytib bo‘lmaydigan xatti-harakatlarga va gaplarga moyilligi ancha oshgan.

Eslatib o‘tamiz, Donald Tramp va uning rafiqasi Melaniyada 2-oktabr kuni koronavirusga topshirgan test javobi ijobiy chiqqan. So‘ng u Uolter Rid nomidagi milliy harbiy tibbiyot markazida davolangan. Shon Konlining ma’lum qilishicha, Trampning organizmida kislorod darajasi 93 foizgacha tushib ketganidan so‘ng deksametazon qo‘llanilgan. Shifokorlar steroidni 3-oktabr kuni remdesivir preparatining ikkinchi dozasi bilan birga qo‘llashni boshlagan, Trampda ikkilamchi ta’sirlar aniqlanmagan.