Қирғизистон парламенти яна бир бор Садир Жапаровни бош вазирликка тасдиқлади

Қирғизистон парламенти (Жўқорғи Кенеши) 4 октябрь куни Садир Жапаров номзодини мамлакат бош вазири лавозимига тасдиқлади, деб хабар бермоқда «24.кг».

Залда йиғилган барча – 83 нафар депутат Садир Жапаров номзодини бир овоздан маъқуллаган. Депутатлар, шунингдек, унинг ҳукумати таркиби ва тузилмасини ҳам қўллаб-қувватлаган.

Эслатиб ўтамиз, Қирғизистон парламенти депутатлари «Mekenchil» («Ватанпарвар») партияси асосчиси Садир Жапаровни бош вазир лавозимига 10 октябрь куни тасдиқлаган эди. Аввалги бош вазир Кубатбек Бўронов мамлакатда парламент сайловидан кейин бошланган намойишлар ва тартибсизликлар ортидан истеъфога чиққанди.

Садир Жапаров 5 сентябрь куни намойишчилар томонидан Бишкекдаги қамоқхоналардан биридан озод қилинган. У Қоракўлда 2013 йилда митинглар уюштиргани ҳамда Иссиқкўл вилояти губернатори Эмилбек Каптагаевни гаровга олгани учун 2018 йилда 11,5 йиллик қамоқ жазосига ҳукм қилинган эди.

13 октябрь куни президент Сўронбой Жээнбеков парламент қарори юридик кучга эга бўлиши учун депутатларнинг етарли сони унга овоз бериши кераклигини айтди. Мамлакат парламенти Жўқорғи Кенешда 120 та депутатлик ўрни борлиги ҳисобга олинганда, қарор қабул қилиш учун камида 61 нафар депутатнинг овози керак эди.

Сўронбой Жээнбеков республика парламентининг янги спикери Канат Исаевга мурожаат қилиб, Садир Жапаров раҳбарлигидаги ҳукумат таркибини яна тасдиқлашни таклиф қилганди.

Депутат Миктибек Абдилдаев янги сайланган бош вазир Садир Жапаровга қарши қўзғатилган жиноий иш тўғрисида эслатиб, у ҳали оқланмаганини таъкидлаб ўтди. Садир Жапаров бунга жавобан Олий суд унинг ишини қайта кўриб чиқиш учун қайтарганини, шу сабабли у маҳкум ҳисобланмаслигини билдирган.