Москва мактабларида таътил тугагач юқори синф ўқувчилари (6—11-синф) 19 октябрдан 1 ноябргача масофадан ўқитишга ўтказилади. Meduza’нинг хабар беришича, бу ҳақда Москва мэри Сергей Собянин маълум қилди.
Бошланғич синф ўқувчилари эса таътилдан сўнг одатдаги таълимга қайтади. Улар учун таътил пайтида тўхтатиб қўйилган мактаб ўқувчилари транспорт картаси блокдан чиқарилади.
Собяниннинг сўзларига кўра, юқори синф ўқувчиларининг коронавирус билан касалланиш хавфи юқори бўлганлиги сабабли шундай чора кўрилмоқда. Ҳозирда Москвада касалланган болаларнинг учдан икки қисми юқори синф ўқувчиларига тўғри келади.
Шунингдек, Собянин Москва мактабларида ўқитишнинг янги формати — тьюторлик вақтинча жорий этилишини маълум қилган. У катта ёшдаги ва сурункали касалликларга чалинган ўқитувчиларни инфекция хавфидан ҳимоя қилиш учун мўлжалланган. Дарсларни ўтказиш учун мактабларга педагогика олий ўқув юртлари талабалари ва битирувчилари таклиф этилади. Уларни ўқитувчилар масофавий тарзда назорат қилиб боради.
Мавзуга доир: Москвада тиббиёт олийгоҳлари талабалари COVID-19’га қарши курашиш учун яна касалхоналарга чақирилди
Аввалроқ Москва мэри Сергей Собянин шаҳарга пандемия яна бостириб кираётганини маълум қилганди. У 9 октябрда ортда қолаётган ҳафтада Москвада коронавируснинг тарқалиши бўйича вазият умуман енгиллашмаганини билдирган. Шунингдек, у 12–18 октябрь кунлари бу борада ҳал қилинадиган оралиқ бўлишини қайд этган. Мэрнинг сўзларига кўра, Москва шаҳри маъмурияти шаҳарни карантин учун ёпиш тарафдори эмас.
13 октябрь куни Россияда COVID-19’га чалиниш ва ундан вафот этиш ҳолатлари бўйича мутлақ рекорд қайд этилди. Сутка давомида аниқланган касалланишлар сони бўйича ҳам, коронавирусдан ўлимлар сони бўйича ҳам Москва биринчи ўринда. Бир ой ичида Москвада касалланиш ҳолатлари беш мартадан кўпроқ ўсди. Касалхоналарга энг оғир беморлар ётқизилмоқда.
Изоҳ (0)