Шавкат Мирзиёев 12 октябрь куни Тожикистон президенти Эмомали Раҳмон билан телефон орқали мулоқот қилди, деб хабар бермоқда Президент матбуот хизмати.
Хабарга айтилишича, давлат раҳбари Тожикистон етакчисини президентлик сайловидаги ишончли ғалабаси билан табриклаб, унга биродар тожик халқи фаровонлиги ва равнақи йўлидаги фаолиятида катта муваффақиятлар тилади.
Суҳбат чоғида Ўзбекистон—Тожикистон дўстлик, яхши қўшничилик ва стратегик шериклик муносабатларини янада мустаҳкамлашнинг долзарб масалалари кўриб чиқилди. Давлат раҳбарлари ўртасида эришилган келишувларни ўз вақтида амалга ошириш, Ҳукуматлараро комиссия қарорларини бажариш ҳамда бўлажак олий даражадаги учрашувлар учун янги кун тартибини ишлаб чиқиш муҳимлиги алоҳида таъкидланди.
Президентлар Қозоғистон, Тожикистон, Туркманистон ва Ўзбекистон давлат раҳбарларининг Қирғизистондаги вазият юзасидан қўшма баёноти қабул қилинганини мамнуният билан қайд этди.
Тожикистоннинг амалдаги президенти Эмомали Раҳмон 11 октябрь куни бўлиб ўтган республика раҳбарлигига сайловларда овозларнинг 90,92 фоизини тўплаб ғолиб бўлди. Овоз беришда сайловчиларнинг 85,39 фоизи қатнашган.
1992 йилдан буён мамлакатни бошқариб келаётган (совет давридан кейинги мамлакатлардаги энг узоқ давом этаётган муддат) Раҳмон учун бу бешинчи президентлик муддатидир.
Эслатиб ўтамиз, Шавкат Мирзиёев 5 октябрь куни Тожикистон президенти Эмомали Раҳмон билан телефон орқали мулоқот қилиб, бўлажак президентлик сайловларида муваффақият тилаган эди.
Изоҳ (0)