Ижтимоий тармоқларда Тошкент шаҳар Мирзо Улуғбек тумани «Оққўрғон» маҳалласида яшовчи эркак турмуш ўртоғига тан жароҳати етказиб, уни боласининг ахлатини ейишга мажбур қилгани акс этган видео тарқалган эди.
Тошкент шаҳар ички ишлар бошқармаси хабар беришича, Мирзо Улуғбек тумани ИИБ ҳузуридаги тергов бўлими томонидан Жиноят кодексининг 110-моддаси 1-қисми (қийноққа солиш) бўйича жиноий иш қўзғатилиб, эркак ҳибсга олинган.
Бўлимнинг қўшимча қилишича, 7 октябрь куни аёлга ҳимоя ордери берилган. Ҳозирда у ва унинг вояга етмаган болалари Оғир аҳволга тушиб қолган аёлларни реабилитация қилиш ва мослаштириш марказига вақтинча жойлаштирилган.
Ҳибсга олинган эркак Zo‘r TV телеканалининг «Бу кун» дастурига берган интервьюсида ўз қилмишининг сабаблари ҳақида гапириб берди.
«Бир куни ишдан қайтдим. Соат 21:00. Келсам (ҳаммомда) қизимнинг ахлати ... Ҳеч ким қарамаган. Улар (онаси ва тўнғич қизим) телефонга қараб ётишибди. Мен қизимни, ҳой, нима қиляпсанлар, деб уришиб бердим.
Ҳаммомга кирсам, у ерда қизимнинг ахлати туалет қоғози билан қопланган. Хонада пашша эмас, чивин бўлади-ку майда, ўшалар учиб юрибди. Қарамадиларингми, соат 9 гача пойладиларингми, десам, сиз яхши қиласизде, дейишди. Кейин қизимни уришдим. У менга, ада, буни сиз ўзингиз яхши қиласиз-ку, бу ишларга аралашмаймиз-ку, дейди. Айбим – уларни шунга ўргатиб қўйганим.
Кейин «гаршок»ни олдимда «роковина»га отиб юбордим, керак бўлса ўзларинг ювларинг деб. Агар шу ахлат ёқаётган бўлса, ол еларинг, дедим жаҳл устида.
Ошхонада озгина ўзимга келишим учун ювиниб олдим. Қизим унгача жилмайиб, расмларга олиб ётибди. Кейин ичкарига кириб, ёғоч таёқни олиб, хотинимни уч-тўрт марта урдим.
Видеони қизим жойлаштирган. У ҳеч нарсани тушунмайди», – деди ҳибсга олинган эркак.
Рустам I. халқни олдида тўғрилигини, чунки у 15 йил давомида гарчи бу ишларни аёли қилиши керак бўлса ҳам, ўз фарзандларини ахлатини тозалаганини айтди.
«Мен буни аввал ҳеч кимга айтмаганман. Бу оила ичида эди. Уйга қайтиб келганимда ҳолатни кўриб «портладим». Мен айбдорман. Ўзимни оқламайман. Аммо кечқурун соат 9 да бундай иш қилиш керак эмасди», – дейди у.
Вилоят ИИБ катта терговчиси Дилмурод Хўжановнинг таъкидлашича, айбланувчи айбини қисман тан олган ва қасддан эмас, балки ғазабланган ҳолда ҳаракат қилган. Терговчининг маълум қилишича, гувоҳлар, жабрланувчилар, қариндошлар ва қўшнилар билан суҳбатлашилгандан сўнг якуний қарор қабул қилинади.
Эслатиб ўтамиз, август ойида ижтимоий тармоқларда Самарқанд шаҳрида эри томонидан аёвсиз калтакланаётгани акс этган аёл видеоси тарқалиб кетган эди. Маълум бўлишича, эр аёлни мунтазам хўрлаган ва мажбурлаб памперс едирган. Эркак турмуш ўртоғини ургани тасвирланган видео интернетда тарқалгач уйидан қочиб кетган. 23 август куни эркак Тошкентда қўлга олиниб, Самарқандга олиб кетилган. Кейинроқ Сенат мазкур аёл билан боғлиқ вазиятни ўз назоратига олганди.
Изоҳ (0)