Бухоро вилоятида коронавирусга чалинган 33 ёшли оғир аҳволдаги бемор ўпка операциясини муваффақиятли ўтказиб, ҳаётга қайтди. Бу ҳақда «Дарё»га вилоят фтизиатрия ва пулмонология маркази бош шифокори Нодир Қобилов маълум қилди.
Маълумот берилишича, тахминан бир ярим ой илгари коронавирусга чалинган ва икки томонлама пневмония ташхиси билан оғриган 33 ёшли бемор — Жамшид Рўзиев шифохонага ётқизилган. Беморнинг рентген ва бошқа таҳлиллари ҳам салбий чиққани сабаб зудлик билан интенсив муолажалар бошланган.
«Бемор Жамшид Рўзиевга учинчи даражали нафас етишмовчилиги, гемопневмоторекс, яъни ўпка яллиғланишининг нисбатан оғир шакли ташхиси қўйилди. Интенсив даво муолажаларидан сўнг торакоцентез усулида, яъни ўпканинг йирингли қон тўпланган чап бўлмаси бўшлиғига тиббий трубка уланиб, йигирма кундан ортиқ вақт давомида алоҳида кислород узатувчи ускуна қўйилди», — дейди шифокор Нодир Қобилов.
Айтилишича, вилоят фтизиатрия ва пулмонология марказининг тажрибали даволовчи врачи Шуҳрат Бозоровнинг саъй-ҳаракати билан ёш бемор мураккаб операциядан омон чиққан.
«Лекин бу бемор касалликдан бутунлай халос бўлди дегани эмас эди. Шу сабаб беморни жарроҳлик амалиётига тайёрлаш мақсадида уни яна бир карра компьютер томографиясидан ўтказиб, текшириб кўрдик. Шунда беморда колибрун, яъни ўпканинг чап томони қисилиши, плевраполос қавати қалинлашгани, тўқималар йирингли қонга тўлгани ҳолати ҳам яққол кўринди. Шундан сўнг зудлик билан консилиум чақирилган ва мутахассис шифокорларнинг ўзаро маслаҳатлашувидан сўнг кун сайин аҳволи оғирлашиб бораётган бемор ўпкасида жарроҳлик амалиёти ўтказилишига қарор қилинган», — дейди даволовчи врач Шуҳрат Бозоров.
Таъкидланишича, даво муолажаларидан сўнг бемор организмидаги сотурация кўрсаткичи 80 фоизга, қон босими 110 га 70 даража, юрак пулси эса дақиқасига 110 тага етказилган ва жарроҳлик амалиётига рухсат этилган.
Операция давомида эса бемор ўпкасининг чап бўлмаси очилиб, бутунлай яроқсиз ҳолга келган қисмидан уч литрдан зиёд йирингли қуюқ қон, ўткир ҳидли ажратма олиб ташланган.
«Операция муваффақиятли кечди. Бемор соғ-саломат ҳаётга қайтди. Бу ерда фақатгина шифокорларнинг саъй-ҳаракатимас, балки ёш беморнинг ҳаётга бўлган талпиниши, иродаси, яшаш учун курашиши ҳам муҳим аҳамиятга эга бўлди. Унинг яшаб кетишига кафолат бор», — деди бош шифокор Нодир Қобилов.
«Дарё» мухбири бемор Жамшид Рўзиев билан суҳбатлашар экан, у оиласи, яқинлари бағрига соғ-омон қайтгани учун шифокорларга миннатдорлигини билдирди.
«Жорий йилнинг 13 август куни оғир аҳволда касалхонага келтиришганди. Кислород аппарати остида ҳолсиз ётган кунларимда жудаям ваҳимага тушгандим. Кўз олдимдан икки ўғлим, яқинларим ўтарди, аммо бир оғиз сўз ҳам айта олмаслигимдан жуда қийналардим. Кўзларим юмуқ, танам ҳолсиз бўлса ҳам шифокорларнинг сўзларини эшитардим. Уларнинг таъсирида яшашим керак, яқинларим учун ҳаётга қайтишим керак, деган мақсад бор эди. Шукурки, тирикман. Тириклигимдан, ҳаётга қайтганимдан хурсандман», — дейди бемор.
Бухоро вилояти электр тармоқлари ҳудудий корхонасида фаолият юритиб келган Жамшид Рўзиев касб тақозоси боис турли тоифадаги одамлар билан мулоқотда бўлган ва касалликни айнан қаердан ва кимдан юқтириб олганини билмайди. Унинг айтишича, оиласида ота-онаси ва укаси ҳам коронавирусга чалиниб, даволаниб чиққан.
Изоҳ (0)