Ўзбекистон Президенти Шавкат Мирзиёев 5 октябрь куни миллий почта тизимини ислоҳ қилиш масалалари бўйича йиғилиш ўтказди. Бу ҳақда Президент матбуот хизмати хабар берди.
Маълум қилинишича, «Ўзбекистон почтаси» АЖ тизимида мамлакатимизнинг барча ҳудудларини қамраб олган 2 мингдан зиёд бўлинма, 7 минг нафар ходим бор. Лекин йиллар давомида эътибор берилмагани оқибатида почта хизматининг ўрни пасайиб кетди. Хусусан, сўнгги 15 йилда 1300 та почта бўлинмаси ёпилган. 2019 йилда хориждан келган 6 минг тонна жўнатмаларнинг атиги 10 фоизи, курьерлик хизматларининг 30 фоизи миллий почта ҳиссасига тўғри келган.
Шу боис жойлардаги аҳвол ўрганилиб, Осиё тараққиёт банки экспертлари иштирокида почта тизимини ислоҳ қилиш бўйича таклифлар тайёрланди. Йиғилишда ушбу чора-тадбирлар Сергели, Янгиқўрғон ва Тошкент туманлари почтаси мисолида тақдимот қилинди.
Давлат раҳбари соҳани ривожлантириш учун почта тизимини даромад келтирадиган соҳага айлантириш зарурлигини таъкидлади. Хусусий операторлар билан ҳамкорликни йўлга қўйиш, қўшимча хизматларни тақдим этиш орқали почта бўлимлари даромадини ошириш мумкинлиги айтилди.
Йиғилишда ҳозирги кунда электрон савдо ривожланаётгани, интернет орқали сотиб олинган товарни эгасига етказиб беришга доим талаб борлиги таъкидланди. Қайд этилишича, Ўзбекистонга кириб келган халқаро ташувчи компанияларнинг ҳудудларда филиаллари йўқ. Бу имкониятлардан оқилона фойдаланиб, почта жўнатмалари ва маҳсулотларни якуний манзилга етказиб беришни йўлга қўйиш яхши самара беради.
«Почта соҳасидаги энг асосий вазифа одамларнинг оғирини енгил, узоғини яқин қилишдир», — деди Президент.
Йиғилишда якуний манзилга етказиш тизимини туманларда тажрибадан ўтказиб, келгуси йил 1 мартдан вилоят марказларида, 1 июлдан мамлакат бўйича жорий этиш режаси белгиланди. Бунинг учун жўнатмаларни қабул қилиш, саралаш ва онлайн кузатиш имконини берувчи автоматлашган ахборот тизимини ишга тушириш кераклиги таъкидланди.
Шунингдек, 2020 йил якунигача миллий онлайн савдо майдончасини жорий этиш бўйича топшириқ берилди. Бу тизим орқали тадбиркорлар ишлаб чиқарган маҳсулотини республика бўйича савдога чиқаради, миллий оператор уларни манзилига етказиб беради. Бунда «Ўзбекистон почтаси» харидор ва сотувчи ўртасида кафил бўлади. Шу мақсадда келгуси йили Тошкент шаҳрида логистика марказини ташкил этиш зарурлиги қайд этилди.
Соҳа даромадини таъминлаш учун яна бир манба — унча мураккаб бўлмаган давлат хизматларини почта бўлимларида ҳам йўлга қўйиш. Шу нуқтаи назардан, «Ўзбекистон почтаси» АЖнинг олис ҳудудлардаги 300 та бўлинмасида 13 хил давлат хизмати кўрсатишни ташкил этиш бўйича топшириқ берилди. Шунингдек, дастлаб Сергели, Янгиқўрғон ва Тошкент туманларидаги почта бўлинмаларида нақд пул инкассацияси, пластик карта амалиёти каби банк хизматларини жорий этиш вазифаси қўйилди.
Сўнгги тўрт йилда «Ўзбекистон почтаси» акциядорлик жамияти томонидан матбуот тарқатиш ҳажми 3 баробарга камайиб, унинг жами матбуот тарқатишдаги улуши 13 фоизни ташкил этмоқда.
Мутасаддиларга босма нашрларни қўллаб-қувватлаш учун матбуот тарқатиш тизимини ривожлантириш, даврий нашрларга онлайн обуна хизматини йўлга қўйиш муҳимлиги таъкидланди.
Янги почта хизматларини йўлга қўйиш учун ходимларни қайта тайёрлаш, почта биносини давлат-хусусий шериклик асосида тадбиркорлар билан бирга ишлатиш масалаларига ҳам эътибор қаратилди.
Эслатиб ўтамиз, 2018 йилда «Ўзбекистон почтаси» акциядорлик жамиятига Россия алоқа вазирлиги почта алоқаси департаменти раҳбари ва «Россия почталари»ни стратегик ривожлантириш кенгаши аъзоси бўлиб ишлаган Евгений Биргер бош директор этиб тайинланганди.
Евгений Биргер 2018 йилда Тошкентда бўлиб ўтган конференцияда нутқ сўзлаб, «Ўзбекистон почтаси» амалдаги нормативлар ва анъанавий фаолиятини амалга ошира олмаётгани ва у тубдан ўзгартиришларга муҳтож эканлигини таъкидлаган. У фуқаролар ҳаёти ва ташкилотлар фаолиятига почтанинг чуқур кириб боришини кўзда тутувчи «Почта 2.0» лойиҳасини тақдим этган. Шундан сўнг унинг «Ўзбекистон почтаси» раҳбари бўлиши маълум қилинганди.
Бироқ Евгений Биргер тайинловдан бир йил ўтиб, 2019 йилнинг июль ойида ўз ўрнини Алишер Файзуллаевга бўшатиб берди.
Маълумот учун, «Ўзбекистон почтаси» фаолиятида буюртмали хатни бир вилоятдан бошқа вилоятга 7 ойда етказиш ҳолатлари кузатилган.
Изоҳ (0)