Тошкентда 5 млрд сўм миқдордаги ноқонуний импорт билан шуғулланган гуруҳ қўлга олинди

Тошкент шаҳрида давлат бюджетига божхона тўловларини тўламаслик мақсадида йирик миқдордаги импорт товарларни паст ставкалик товарларга алмаштириш билан шуғулланиб келган жиноий гуруҳ аниқланди, дея хабар бермоқда «Дарё»га шаҳар божхона бошқармаси.

Қайд этилишича, 2020 йилнинг 4 октябрь куни Тошкент шаҳар божхона бошқармаси Контрабандага қарши курашиш ва божхона аудити ҳамда Коррупцияга қарши курашиш ва ўз хавфсизлик бўлимлари томонидан «Чуқурсой» божхона пости билан ҳамкорликда ўтказилган тезкор тадбирда давлат бюджетига божхона тўловларини тўламаслик мақсадида йирик миқдордаги импорт товарларни паст ставкалик товарларга алмаштириш билан шуғулланиб келган, пухта ўйланган жиноий схемага асосланган жиноий гуруҳ фаолияти фош этилди.

Маълум бўлишича, олдиндан тузилган режага кўра ташкилот номига хориждан импорт қилинган юқори ставкалик генератор, сув пуркагич, чангютгич, кирювгич каби қимматбаҳо хўжалик ускуналари ва қурилиш анжомлари «вақтинча сақлаш» божхона режимига расмийлаштирилиб, ўз омборида юқоридаги товарлар ўрнига жиноий гуруҳ аъзолари томонидан сохта йўл-юк кузатув ҳужжатларида кўрсатилган қулф, электрод, токқайчи ва арра каби 16 турдаги товарларга алмаштирилаётган вақтда тўхтатиб қолинган.

Юк эгалари ушбу жиноятни амалга ошириш учун жиноий гуруҳга 20 нафар шахсларни ёллаб, ҳар бирининг вазифаларини тақсимлаган.

Дастлабки ҳисоб-китобларга кўра, йўл-юк ҳужжатларида кўрсатилмаган ва ашёвий далил сифатида олинган 31 турдаги 4214 дона товарнинг умумий қиймати 5 миллиард сўмни ташкил этиши маълум бўлди.

Таъкидланишича, жиноий гуруҳнинг ғараз мақсадлари амалга ошганда, давлат ғазнасига бор-йўғи 1 миллиард сўм миқдорида божхона тўловлари ундирилиб, 4 миллиард 500 миллион сўмликдан ортиқ зарар етказилар эди.

Мазкур аниқланган қонунбузарлик ҳолати юзасидан ҳозирда божхона органлари томонидан терговга қадар текширув ҳаракатлари олиб борилмоқда. Корхонанинг ташқи иқтисодий фаолияти эса божхона аудитидан ўтказилади.