Buxoro viloyatida koronavirusga chalingan 33 yoshli og‘ir ahvoldagi bemor o‘pka operatsiyasini muvaffaqiyatli o‘tkazib, hayotga qaytdi. Bu haqda “Daryo”ga viloyat ftiziatriya va pulmonologiya markazi bosh shifokori Nodir Qobilov ma’lum qildi.
Ma’lumot berilishicha, taxminan bir yarim oy ilgari koronavirusga chalingan va ikki tomonlama pnevmoniya tashxisi bilan og‘rigan 33 yoshli bemor — Jamshid Ro‘ziyev shifoxonaga yotqizilgan. Bemorning rentgen va boshqa tahlillari ham salbiy chiqqani sabab zudlik bilan intensiv muolajalar boshlangan.
“Bemor Jamshid Ro‘ziyevga uchinchi darajali nafas yetishmovchiligi, gemopnevmotoreks, ya’ni o‘pka yallig‘lanishining nisbatan og‘ir shakli tashxisi qo‘yildi. Intensiv davo muolajalaridan so‘ng torakotsentez usulida, ya’ni o‘pkaning yiringli qon to‘plangan chap bo‘lmasi bo‘shlig‘iga tibbiy trubka ulanib, yigirma kundan ortiq vaqt davomida alohida kislorod uzatuvchi uskuna qo‘yildi”, — deydi shifokor Nodir Qobilov.
Aytilishicha, viloyat ftiziatriya va pulmonologiya markazining tajribali davolovchi vrachi Shuhrat Bozorovning sa’y-harakati bilan yosh bemor murakkab operatsiyadan omon chiqqan.
“Lekin bu bemor kasallikdan butunlay xalos bo‘ldi degani emas edi. Shu sabab bemorni jarrohlik amaliyotiga tayyorlash maqsadida uni yana bir karra kompyuter tomografiyasidan o‘tkazib, tekshirib ko‘rdik. Shunda bemorda kolibrun, ya’ni o‘pkaning chap tomoni qisilishi, plevrapolos qavati qalinlashgani, to‘qimalar yiringli qonga to‘lgani holati ham yaqqol ko‘rindi. Shundan so‘ng zudlik bilan konsilium chaqirilgan va mutaxassis shifokorlarning o‘zaro maslahatlashuvidan so‘ng kun sayin ahvoli og‘irlashib borayotgan bemor o‘pkasida jarrohlik amaliyoti o‘tkazilishiga qaror qilingan”, — deydi davolovchi vrach Shuhrat Bozorov.
Ta’kidlanishicha, davo muolajalaridan so‘ng bemor organizmidagi soturatsiya ko‘rsatkichi 80 foizga, qon bosimi 110 ga 70 daraja, yurak pulsi esa daqiqasiga 110 taga yetkazilgan va jarrohlik amaliyotiga ruxsat etilgan.
Operatsiya davomida esa bemor o‘pkasining chap bo‘lmasi ochilib, butunlay yaroqsiz holga kelgan qismidan uch litrdan ziyod yiringli quyuq qon, o‘tkir hidli ajratma olib tashlangan.
“Operatsiya muvaffaqiyatli kechdi. Bemor sog‘-salomat hayotga qaytdi. Bu yerda faqatgina shifokorlarning sa’y-harakatimas, balki yosh bemorning hayotga bo‘lgan talpinishi, irodasi, yashash uchun kurashishi ham muhim ahamiyatga ega bo‘ldi. Uning yashab ketishiga kafolat bor”, — dedi bosh shifokor Nodir Qobilov.
“Daryo” muxbiri bemor Jamshid Ro‘ziyev bilan suhbatlashar ekan, u oilasi, yaqinlari bag‘riga sog‘-omon qaytgani uchun shifokorlarga minnatdorligini bildirdi.
“Joriy yilning 13-avgust kuni og‘ir ahvolda kasalxonaga keltirishgandi. Kislorod apparati ostida holsiz yotgan kunlarimda judayam vahimaga tushgandim. Ko‘z oldimdan ikki o‘g‘lim, yaqinlarim o‘tardi, ammo bir og‘iz so‘z ham ayta olmasligimdan juda qiynalardim. Ko‘zlarim yumuq, tanam holsiz bo‘lsa ham shifokorlarning so‘zlarini eshitardim. Ularning ta’sirida yashashim kerak, yaqinlarim uchun hayotga qaytishim kerak, degan maqsad bor edi. Shukurki, tirikman. Tirikligimdan, hayotga qaytganimdan xursandman”, — deydi bemor.
Buxoro viloyati elektr tarmoqlari hududiy korxonasida faoliyat yuritib kelgan Jamshid Ro‘ziyev kasb taqozosi bois turli toifadagi odamlar bilan muloqotda bo‘lgan va kasallikni aynan qayerdan va kimdan yuqtirib olganini bilmaydi. Uning aytishicha, oilasida ota-onasi va ukasi ham koronavirusga chalinib, davolanib chiqqan.
Izoh (0)