Қашқадарё вилояти прокуратураси «Дарё» интернет-нашрида 4 октябрь куни эълон қилинган «‘Агар молга бизни қийнагандек азоб беришса, у ҳам гапириб юборарди’. ‘Кондесат ишиъда айбланаётган қашқадарёликлар ДХХ ҳибсхонасида қийноққа солинганини айтди» сарлавҳали очиқ суд мажлисидан тайёрланган репортажга муносабат билдирди.

Дилшод Умаров.

Фото: «Дарё»

Репортажда «конденсат иши»да айбланаётган Алишер Гулистонов ва Дилшод Умаров ДХХ тергов ҳибсхонасидаги тергов жараёнида қийноққа солингани, соатлаб қўлидан осиб қўйилиб, руҳий ва жисмоний босим ўтказилганини, агар «терговчиларнинг айтганини қилмаса, отаси ва акасини қаматиб юбориш билан қўрқитгани»ни айтган.

Алишер Гулистонов.

Фото: «Дарё»

«Жиноят ишини юритиш чоғида қамоқда сақлаш тўғрисида»ги қонунининг 8-моддасида қамоққа олинганлар ИИВ ва ДХХ органларининг тергов ҳибсхоналарида сақланиши кўрсатилган. Қашқадарё вилояти прокуратураси баёнотига кўра, «конденсат иши»да айбланаётганлар орасида ички ишлар органлари ходимлари борлиги, «терговнинг холисона ўтказилиши, тергов сирининг фош этилишини олдини олиш мақсадида» қамоққа олинган айбланувчилар ДХХ Қашқадарё вилояти бошқармасининг тергов ҳибсхонасида сақланган.

«Терговда айбланувчиларнинг ҳимоя ҳуқуқи таъминланиб, улар билан боғлиқ барча тергов ҳаракатлари ҳимоячилари иштирокида Жиноят-процессуал кодексининг 91-моддасига асосан видеоёзув воситаларидан фойдаланган ҳолда ўтказилган бўлиб, айбланувчиларга 24 маротаба ҳимоячилари билан холи учрашишлари, ўрнатилган тартибда 8 маротаба яқин қариндошлари билан учрашишлари ва 7 маротаба телефон орқали сўзлашишлари таъминланиб, ҳар уч кунда тиббий кўрикдан ўтказиб борилган», -- дейилади Қашқадарё прокуратураси баёнотида.

Шунингдек, тергов органи томонидан Жиноят-процессуал кодексининг 142-моддасига асосан, қамоқда сақланган айбланувчилар билан ҳимоячилари иштирокида гувоҳлантириш тергов ҳаракати ўтказиб борилган ва бунда, вилоят прокуратурасининг қайд этишича, айбланувчиларда тан жароҳатлари аниқланмаган. «ДХХ Қашқадарё вилояти бошқармасининг тергов ҳибсхонасида видеокузатув воситалари ўрнатилган бўлиб, қамоққа олинган айбланувчиларга нисбатан тергов ҳибсхонасида жисмоний ёки руҳий тазйиқ ўтказилмаган», -- дейилади прокуратура ахборотида.

Аввал хабар берилганидек, мазкур жиноят иши ҳозирда жиноят ишлари бўйича Қашқадарё вилоят судида кўриб чиқилмоқда. Қашқадарё вилоят прокуратураси баёнотида алоҳида таъкидланишича, «айбланувчиларнинг уларга нисбатан жисмоний ва руҳий тазйиқ ўтказилганлиги ҳақидаги важларига суд томонидан ҳам ҳуқуқий баҳо берилади».