Сурхондарё вилоят ҳокимлиги Қумқўрғон туманидаги кўприк ҳақидаги мақолага муносабат билдириб, сифатсиз кўприк қурган қурувчи ишини дастлаб жиноят иши очишни рад этган транспорт прокуратураси ўрганаётганини маълум қилди.
Ҳокимликнинг ёзишича, умумий фойдаланишдаги давлат аҳамиятига эга 4Р-105 Дарбанд— Бойсун—Элбаён автомобиль йўлининг Қумқўрғон тумани ҳудудидан ўтувчи 70-89 км ҳамда автомобиль йўлининг 76-км қисмидаги «Полвонтош» селгасидаги кўприк 2013 йилда содир бўлган табиий офат оқибатида зарар кўрган. Қумқўрғон туман ҳокимининг 2013 йил 5 сентябрдаги қарорига асосан мазкур кўприкни қуриш масъулияти «Баҳром универсал қурилиш» МЧЖга юклатилган.
2014—2018 йилларда кўприкнинг асосий қурилиш ишлари якунланиб, автотранспорт воситалари ҳаракати учун очилган. Аммо буюртмачи вилоят автомобиль йўллари ҳудудий Бош бошқармасининг расмий огоҳлантириш хатлари ва қонунда белгиланган тартибда қўллаган жарима тадбирларига қарамасдан пудратчи «Баҳром универсал қурилиш» МЧЖ томонидан лойиҳада кўзда тутилган қолдиқ иш ҳажмлари – қирғоқни мустаҳкамлаш ишларини бажариш узоқ вақт пайсалга солиб келинган.
«Оқибатда 2019—2020 йиллар, жумладан, жорий йилнинг март—апрель ойларида сел оқими одатдаги ҳажмга нисбатан уч-тўрт баробар кўп келганлиги натижасида кўприкка жиддий зарар етган», — дейилади ҳокимлик муносабатида. — Жумладан, мазкур кўприк жойлашган сел йўлининг мавжуд сув сатҳи уч йил давомида ўртача 5—6 метргача пасайиши натижасида кўприкнинг 3-таянч қисми 5-6 метргача очиқ ҳолга келган. Жорий йилнинг апрель—май ойларида ўта кучли сел келиши натижасида кўприкнинг 3-таянчи лойиҳавий ҳолати ўзгариб, чўкиш содир бўлган».
Шундан сўнг ҳудудда яшовчи аҳолига қатнов учун етарли шароит яратиш мақсадида вилоят автомобиль йўллари Бош бошқармаси ҳамда туман йўллардан фойдаланиш корхонаси томонидан кўприкда ҳаракатланиш чекланиб, вақтинча айланиб ўтиш йўли қурилган.
«Дарё» мухбири билан суҳбатлашган аҳоли вакиллари эса, вақтинча айланиб ўтиш йўли ҳам аҳоли ташаббуси билан қурилганини айтганди.
Бу ҳақда маълумот берган Ўткир Холматов айланма йўл аҳолида мавжуд бўлган техникалар ёрдамида қилинганини, сел келгач сел ўтиш йўли ювиб кетилганини, шундан сўнг масъуллар сел ўтиши учун труба келтириб ўрнатиб, бюджетдан яна 500-600 миллион сўм олганини айтмоқда.
Аввалроқ, Сурхондарё вилоят прокуратураси 6,5 миллиард сўмга қурилиб, 1 йил-у 7 ой хизмат кўрсатган кўприк масаласига муносабат билдириб, «Термиз транспорт прокуратурасининг 2020 йил 18 июнь куни Ўзбекистон Республикаси Жиноят процессуал кодексининг 83-моддаси 2-бандига асосан жиноят иши қўзғатишни рад этиш ҳақида қарори бекор қилиниб, 2020 йил 29-сентябр куни терговга қадар текширув ҳаракатлари бошлаб юборилди», деганди.
Вилоят ҳокимлиги эса ўша текширув Термиз транспорт прокуратураси томонидан олиб борилаётганини очиқлаган.
Ҳокимликнинг ахборот беришича, пудратчига нисбатан таъсир чоралари самарасиз қолаётганлиги сабаб вилоят автомобиль йўллари Бош бошқармаси вилоят прокуратурасига шикоят қилган. Шунга кўра, мазкур кўприк қурилиши бошқа пудратчига берилган.
«Севимли» каналининг «Замон» информацион дастури журналистларининг маълумот тўплашича, мазкур кўприк қурилишига яна 9 миллиард сўм маблағ ажратилган.
Сурхондарё вилоят ҳокимлиги ўз муносабатида аҳолининг 19 км йўл сифатсиз қурилаётгани ҳақидаги шикоятига ҳам тўхталиб, «мазкур ҳолат вилоят автомобиль йўллари ҳудудий Бош бошқармаси, Қумқўрғон туман йўллардан фойдаланиш унитар корхонаси, лойиҳачи корхона, оммавий ахборот воситалари ҳамда маҳаллий аҳоли вакиллари иштирокида жойида ўрганиб чиқилди», — дейди.
Айтилишича, ўрганиш жараёнида таъмирлаш ишлари меъёрий ҳужжатларга асосан амалга оширилаётгани айтилиб, мутахассислар бажарилган ишларнинг сифати тўғрисида ОАВга қўшимча маълумот берган.
Ҳокимликнинг ёзишича, автомобиль йўлларида амалга оширилаётган таъмирлаш ишлари сифати алоқадор ташкилотлар ва вилоят автомобиль йўллари ҳудудий Бош бошқармаси томонидан тўлиқ назоратга олинган.
Изоҳ (0)