Ўзбекистонда иқтисодий ўсиш 2020 йилнинг биринчи ярмида 0,2 фоизгача пасайиб, асосан қишлоқ хўжалиги (2,8 фоиз) ва қурилиш (7,3 фоиз) соҳаларидаги ўсиш ҳисобига ижобий кўрсаткични сақлаб қолди. Бошқа соҳаларда ҳам пасайиш кузатилди. Бу ҳақда Европа тикланиш ва тараққиёт банкининг (ЕТТБ) янги макроиқтисодий ҳисоботига асосланиб «Gazeta.uz» хабар берди.
Ҳисоботга кўра, саноат ва газ қазиб олиш 1,9 фоиз ва 17,1 фоизга камайган. Меҳмонхона бизнеси ва чакана савдода 1,1 фоизга, транспорт ва сақлаш, ахборот ва алоқада — 3,2 фоизлик пасайиш кузатилди. Январь–июль ойларида ишсизлик 13,2 фоизгача ўсди (бир йил олдин — 9,1 фоиз эди), реал даромадлар эса 1,7 фоизга камайди.
Ялпи талаб фонида инфляция август ойида 11,7 фоизгача пастлади (2019 йил августда — 16,5 фоиз эди), бу Марказий банкни қайта молиялаш ставкасини йиллик 15 фоиздан 14 фоизгача туширишга мажбур қилди.
Ҳисоботда таъкидланишича, Инқирозга қарши жамғарма (ЯИМнинг 1,5 фоизга яқини) ташкил этганига қарамай, мамлакат кучли ташқи босимни бошдан кечирмоқда. Йилнинг етти ойида импорт тахминан 18 фоизга, экспорт эса 21 фоизга камайган. Россия ва Қозоғистондаги иқтисодий фаолликнинг сустлашуви ва январь—июль ойларида пул ўтказмаларининг 7 фоизга пасайиши туфайли ташқи мувозанат янада ёмонлашди.
Умуман олганда, ЕТТБ бу йил реал ЯИМнинг 2 фоизга қисқаришини прогноз қилмоқда. Таҳлилчилар экспорт ва ички талабнинг тикланиши билан боғлиқ ҳолда 2021 йилда 4,5 фоизга ўсишни кутмоқда.
Аввалроқ ЕТТБ экспортнинг тикланиши ва ички талабнинг ўсиши шароитида 2021 йилда Ўзбекистон ЯИМ 6,5 фоизга ўсишини прогноз қилганди.
Изоҳ (0)