Turkiyada 100 yil deganda birinchi marta yangi cherkov qurildi

Turkiyada 1923-yildan buyon birinchi marta, ya’ni zamonaviy Turkiya respublikasida yangi xristian cherkovi qurildi. Bu haqda Turkiyaning TRT teleradiokanali xabar berdi.

Avliyo Efrayim pravoslav cherkovi qurilishi rekord darajada qisqa muddatda — atigi bir necha oyda yakunlangan. U Suriyaning nasroniy monofizitlarning iltimosiga binoan Istanbulning Yevropa qismida joylashgan Bakirkoy hududida barpo etilgan.

Sig‘imi taxminan 700 kishini tashkil qiluvchi ushbu cherkovni 2021-yilning birinchi yarmida tantanali ravishda ochish rejalashtirilmoqda. Uning yaqinida Suriya pravoslav cherkovi metropoliteni, mahalliy Suriya jamoatchiligini boshqaradigan Yusuf Chetin qarorgohi joylashadi.

Bugungi kunda mamlakatda qariyb 25 ming nafar suriyalik xristan, asosan Isantanbulning chekkalarida istiqomat qiladi. Turkiya hukumati ushbu diniy jamoaga alohida e’tibor qaratadi.

“Interfaks”ning yozishicha, Turkiya OAVlari Istanbuldagi Avliyo Sofiya muzeyini masjidga aylantirish natijasida yuzaga kelgan tanqidlar fonida Turkiya respublikasi tarixidagi birinchi cherkovning qurilishini mamlakat rahbariyatining muhim qadami deb atadi.

Eslatib o‘tamiz, Istanbulda Avliyo Sofiya muzeyini masjidga aylantirilishi borasidagi bahs-munozaralar 29-may kuni Konstantinopolning qulashi munosabati bilan u yerda Qur’on xatm qilinganidan keyin boshlanib ketgan. Oradan bir hafta o‘tgach Erdo‘g‘on ibodatxonani masjidga aylantirish imkoniyatini ko‘rib chiqishni buyurgan. Keyinchalik adliya vaziri Abdulhamid Gul hamda tashqi ishlar vaziri Mevlyut Chavusho‘g‘lu ibodatxonaning yana masjidga aylantirilishi tarafdori ekanligini bildirgan.

G‘arb davlatlarining yuqori martabali amaldorlari, diplomatlar, jumladan, AQSh davlat kotibi Maykl Pompeo ibodatxonaning masjidga aylantirilishiga qarshi chiqqandi.

Rajab Toyyib Erdo‘g‘on Avliyo Sofiya majmuasini masjidga aylantirish masalasida boshqa davlatlarning fikri ahamiyatsiz ekanini aytgan, shuningdek, mamlakatda xristianlik diniga oid madaniy meros obyektlarining himoya qilinishini ta’kidlagan va misol tariqasida Trabzondagi Panagiya Sumela pravoslav monastirining qayta ta’mirlanganini qayd etgandi.